Лідар прафзвязу РЭП у Бярозе: Радуе тое, што беларусы хочуць «людзьмі звацца»
- 11.12.2019, 13:06
- 9,608
Гэта дае надзею на будучыню.
Бярозаўскія праваабаронцы традыцыйна адзначылі на галоўнай вуліцы горада Міжнародны дзень абароны правоў чалавека, паведамляе «Радыё Рацыя».
Разам з вуснымі віншаваннямі гараджане атрымалі спецвыпуск газеты «Народная воля». 300 асобнікаў газеты разышліся літаральна за гадзіну.
Гэта значыць, што людзей цікавяць правы чалавека, кажа актывістка Беларускай сацыял-дэмакратычнай партыі (Грамада), кіраўніца мясцовай суполкі прафзвязу РЭП, экс-кандыдатка ў «дэпутаты» «палаты прадстаўнікоў» Таццяна Тарасевіч.
«Вельмі прыемна, што людзі з задавальненнем бралі газэту. Ім падабалася сённяшняя тэма. Людзям ужо надакучыла, што іх гнабяць і гнабяць. Яны хочуць, як сказаў наш паэт, людзьмі звацца. Нават людзі маладыя і сярэдняга ўзросту не ведаюць пра свае правы, таму з задавальненнем бралі газету, каб "ліквідаваць прабелы"», – апавяла Таццяна Тарасевіч.
«Проста мала інфармацыі і ў СМІ. Людзям не даносяць, не апавядаюць»
«Нават у думках не прыходзіла пра свае правы даведацца. Чула, што яны гарантаваныя ў рамках Канстытуцыі», – кажуць жыхары Бярозы.
Паводле словаў Таццяны Тарасевіч, адмовіліся ад газеты толькі тры чалавекі. Гэта радуе і дае надзею на лепшае.
