19 лютага 2020, Серада, 15:51
Засталося зусім крыху
Рубрыкі

СМІ: У Крыме на «лецішчы Пуціна» будуюць лядовы палац

13
СМІ: У Крыме на «лецішчы Пуціна» будуюць лядовы палац

Будоўлю ахоўваюць узброеныя людзі.

На Паўднёвым беразе Крыма, паміж Фаросам і Ялтай, ідзе актыўнае будаўніцтва на тэрыторыі дзяржаўнага лецішча, якое звязваюць з прэзідэнтам Расеі Уладзімірам Пуціным. У жніўні там з'явілася татамі, а цяпер будуецца лядовы палац. Пра гэта піша выданне "Праект", якое пазнаёмілася з будаўнічымі дакументамі.

Выданне публікуе фатаграфіі будучага спартыўнага аб'екта, які пазначаны ў дакументах як "крытая хакейная пляцоўка №65 паводле ГП на аб'екце К-117". Пакуль гатовы толькі каркас.

Як адзначае "Праект", лядовы палац для Крыму - рэдкасць, на паўвыспе ёсць толькі прыватныя каткі ў гандлёвых цэнтрах.

Лядовыя арэны ёсць і на іншых аб'ектах нерухомасці, якія звязваюць з Пуціным. У 2016 годзе РБК выявіў шыкоўны каток плошчай больш за дзве тысячы квадратных метраў у рэзідэнцыі на Валдаі. У траўні 2019 года "Праект" пісаў, што ў рэзідэнцыі "Горкі 10" на Рублёва-Успенскай шашы таксама ёсць лядовая арэна.

"Праект" звярнуў увагу на тое, што за тры гады на тэрыторыі дзяржаўнага лецішча, са звестак партала дзяржзакупак, рэканструявалі басейны, спа-комплекс, адрамантавалі сістэму вентыляцыі і кандыцыянавання, пабудавалі інтэрнат для персаналу і правялі супрацьапоўзневыя працы. Заказчык - крымскае аддзяленне Федэральнай службы аховы (ФСА), вайсковая-будаўнічая ўправа Мінабароны і структура кіраўніка справамі прэзідэнта ў Паўночна-Заходняй акрузе.

Улетку гэтага года на дзяржаўным лецішчы ў Крыме на месцы тэніснага корта быў пабудаваны татамі - падобная на ангар канструкцыя з залай унутры - плошчай на 500 квадратных метраў. Са слоў крыніцы, аб'ект спяшаліся здаць да пачатку жніўня 2019 года, калі ў анэксаваны Расеяй Крым прыехаў Пуцін.

Суседнія дзяржаўнай лецішчы № 9 і 10 нібыта прызначаныя для Дзмітрыя Мядзведзева. Выданне піша, што прэм'ера некалькі разоў бачылі на іх у 2014 годзе. На лецішчах таксама ёсць спартыўна-аздараўленчы комплекс з трэнажорнай залай, сумешчаным крытым і адкрытым басейнам і спа-зонай. У 2017 годзе на рамонт спарткомплексу, паводле сайту дзяржаўных закупак, выдаткавалі 90 мільёнаў рублёў.

Надзелы, дзе вядуцца работы, абгароджаныя высокім каменным парканам. Будоўлю ахоўваюць узброеныя людзі, піша "Праект".

Пуцін пасля анэксіі ў 2014 годзе неаднаразова прыязджаў у Крым, аднак надоўга ён там не затрымліваўся. Яго асноўная чарнаморская рэзідэнцыя - "Бачароў ручай" у Сочы. Украіна пасля кожнага прыезду Пуціна ў Крым накіроўвае Расеі ноты пратэсту.