Колькасць пацярпелых падчас пажару на «Адмірале Кузняцова» вырасла да 12

(абноўлена) Адзіны расейскі авіяносец гарэў пад Мурманскам.

Колькасць тых, хто звярнуўся па медыцынскую дапамогу пасля пажару на цяжкім авіяносным крэйсеры «Адмірал Кузняцоў» павялічылася да 12 чалавек. Пра гэта паведамляе ТАСС са спасылкай на суразмоўцу ў Цэнтры медыцыны катастроф Мурманскай вобласці.

Дзесяць чалавек былі выратаваны непасрэдна падчас пажару. Большасць з дастаўленых у бальніцы атрымалі атручэнне прадуктамі гарэння.

Пра 12 пацярпелых таксама піша «Интерфакс», спасылаючыся на інфармаваную крыніцу. Выданне паведамляе, што падчас здарэння на караблі без вестак прапалі тры чалавекі. Пра тое, што ідуць пошукі трох чалавек, прадстаўнік экстраных службаў паведаміў «РИА Новости».

Пажар на судне пачаўся раніцай 12 снежня. Як паведамілі ў прэс-службе АТ «Центр судоремонта «Звездочка», якое займаецца рамонтам крэйсера, прычынай узгарання сталі зварачныя працы ў труме.