Дзе знайсці жывую навагоднюю ялінку, каб пры гэтым гаманец не апусцеў

Да Новага года засталіся лічаныя тыдні.

Самы час задумацца пра галоўны атрыбут свята. Таму, хто спыніў выбар на штучнай ялінцы, застанецца толькі дастаць яе з каморы і прыбраць цацкамі і гірляндамі. Тым, хто аддае перавагу сапраўднай ігліцы, яшчэ трэба будзе здабыць зялёную прыгажуню. Як зрабіць гэта без шкоды для навакольнага асяроддзя, высветлілі «Менск-Навіны».

– Набываючы дрэўца на елкавых кірмашах, можна быць упэўненым, што святочная атмасфера і хвойны водар у вашым доме будуць панаваць не на шкоду прыродзе, – кажуць спецыялісты Менскага гарадскога камітэта прыродных рэсурсаў і аховы навакольнага асяроддзя. – Іх нарыхтоўку лясгасы і іншыя арганізацыі ажыццяўляюць у спецыяльна прызначаных для гэтага гадавальніках: елкі і хвоі там вырошчваюць на продаж. На елачныя кірмашы трапляюць і тыя дрэвы, якія высякаюць праз вытворчую неабходнасць, напрыклад для расчысткі трасаў, прасек, палос адводу, ліній электраперадачы, на лесасеках галоўнага карыстання.

Аднак у Менгаркампрыроды са шкадаваннем канстатуюць: штогод напярэдадні Новага года браканьеры высякаюць сотні елак і соснаў, што наносіць істотную шкоду прыродзе. Таму ў снежні патруляванне лясных масіваў і гарадскіх тэрыторый узмацняюць, каб выявіць і змусіць да адказнасці грамадзянаў, якія незаконна ссякаюць гэтыя дрэвы. Эколагі нагадваюць: заканадаўствам нашай краіны за гэта прадугледжаная адміністрацыйная адказнасць – давядзецца заплаціць не толькі штраф, але і кампенсацыю шкоды, нанесенай навакольнаму асяроддзю.

Нагадаем, штраф за незаконнае высяканне, выдаленне і перасадку, пашкоджанне або знішчэнне раслінаў можа дасягаць 300 базавых велічыняў (7 650 рублёў). Акрамя таго, за незаконнае знішчэнне прысадаў вызначаны таксы для кампенсацыі шкоды, нанесенай навакольнаму асяроддзю.