Як бульдозеры «добраўпарадкавалі» Гальшанскі замак
26- 14.12.2019, 11:43
- 49,623
Абабраны магільнік 700-гадовай даўніны.
Побач з замкам у Гальшанах бульдозеры знішчылі і пашкодзілі магільнік XIV стагоддзя. Археолаг Яўген Уласавец паведаміў у Фэйсбуку, што адно пахаванне цалкам разбуранае, два іншыя пашкоджаныя гусеніцамі, і толькі чацвёртае цалкам ацалела. Пры гэтым меркаваная плошча магільніка, якому блізу 700 гадоў, або засыпаная пластом пяску, або залітая бетонам.
У апошнія дні вакол замка адбываецца так званае "добраўпарадкаванне тэрыторыі". Там ўладкоўваецца аўтамабільная стаянка, кладзецца тратуарная плітка. На месцы, дзе працавала тэхніка, археолагі знайшлі жаночы чэрап, косткі і ўпрыгажэнні.
"Ва ўсіх на слыху рэстаўрацыйныя працы на тэрыторыі Віленскага замка, у ходзе якіх былі выяўленыя магілы паўстанцаў 1863 года. Гэтая навіна знайшла жывы водгук у беларускім грамадстве. Тысячы людзей падпісалі петыцыю пра перапахаванне лідара паўстанцаў Кастуся Каліноўскага на тэрыторыі Беларусі...
Беларускія ж рэаліі ашаламляльна адрозніваюцца ад літоўскіх. Большасць працаў на аб'ектах гісторыка-культурнай спадчыны праходзіць без якога-небудзь удзелу археолагаў. Сітуацыя з Гальшанскім замкам і магільнікам наглядна ілюструе тое, да чаго прыводзяць працы з найгрубейшымі парушэннямі дзейнага заканадаўства", – мяркуе Уласавец.
Гальшанскі замак знаходзіцца ў Ашмянскім раёне (Гарадзенская вобласць). Яўген Уласавец даследуе наваколлі замка з 2011 года, там знойдзеныя дзясяткі артэфактаў. Археолаг звяртаецца да неабыякавых людзей з просьбай паспрабаваць змяніць "катастрафічную сітуацыю ў сферы аховы нашай гістарычнай спадчыны".
"Бо лёс гэтых безыменных парэшткаў жыхароў сярэднявечных Гальшанаў цалкам маглі падзяліць і магілы паўстанцаў 1863 года на чале з Каліноўскім, апыніся яны воляю лёсаў не на тэрыторыі Літвы, а ў Беларусі", – вынікуе Уласавец.