Слонімская лякарня пракаментавала рэзананснае фота падвячорку

Людзі параўноўвалі падвячорак з пайком у блакадным Ленінградзе.

У групе "Жыццё Слоніма" з'явіўся каментар адміністрацыі Слонімскай ЦРБ з нагоды рэзананснага фота падвячорку, якім кормяць пацыентаў у мясцовай лякарні. Як сцвярджаюць супрацоўнікі адміністрацыі, фота з выявай прадуктаў харчавання ў выглядзе «бутэрброда» з'яўляецца асабістай інтэрпрэтацыяй пацыента і тым самым з'яўляецца падставай для неабгрунтаваных і не вартых абмеркаванняў наведвальнікамі розных груп, піша "Газета Слонімская".

Фота падвячорку - бутэрброд з белым хлебам і варанай каўбасой і запечанай бульбінай - сапраўды выклікаў процьму каментароў. Допісы з ім з'явіліся не толькі ў сацсетках, але і на сайтах многіх рэспубліканскіх СМІ.

Некаторыя людзі параўноўвалі падвячорак з пайком у блакадным Ленінградзе. Іншыя пісалі, што гэта вельмі смачны падвячорак, і што ў лякарні кормяць вельмі добра, што непатрабавальныя пацыенты вельмі нават задаволеныя і ўдзячныя за разнастайнае і смачнае меню. Хтосьці адзначаў, у лякарню людзі ідуць лячыцца, а не паесці, а хтосьці жартаваў, што, маўляў, пачаўся пост і што лякарня не прэзідэнцкая.

У сваім каментары Слонімская ЦРБ зрабіла акцэнт менавіта на форме падачы ежы і падала ў прыклад свае фота абедаў, якімі кормяць у шпіталі, заўважыўшы пры гэтым, што «ніхто з пацыентаў не выказаў сваёй незадаволенасці пра аб'ёмы порцый і смакавыя якасці прыгатаваных і пададзеных страў».

Падаем тэкст каментару цалкам:

Паважаныя наведвальнікі груп, госці і жыхары г. Слоніма! Харчаванне ў УАЗ «Слонімская ЦРБ» арганізавана ў адпаведнасці з патрабаваннямі нарматыўных дакументаў Міністэрства аховы здароўя Рэспублікі Беларусь (пастанова Міністэрства аховы здароўя Рэспублікі Беларусь № 135 ад 29.08.2008 года "Аб зацвярджэнні інструкцыі аб арганізацыі дыетычнага харчавання ў дзяржаўных арганізацыях аховы здароўя»), паводле якога выкарыстоўваюцца стандартныя дыеты для харчавання пацыентаў. Пададзеныя на фота прадукты харчавання ўваходзяць у пералік асноўных дыет. Ва ўсіх лячэбных установах харчаванне з'яўляецца дыетычным, пры разліку сутачных нормаў збалансавана паводле бялкоў, тлушчаў, вугляводаў і з улікам сутачнай энэргетычнай каштоўнасці (к/кал). Набыццё каўбасных вырабаў (вараная каўбаса вышэйшага гатунку) ажыццяўляецца праз працэдуру закупкі з сертыфікатам якасці, адпавядае патрабаванням і можа выкарыстоўвацца для харчавання пацыентаў. Запечаная бульба багатая на мікраэлементамі (калій, магній, абалоніну і вітамін В6) і рэкамендуецца ў ежу пры розных дыетах.

На сняданак, падвячорак, абед і вячэру пацыенты запрашаюцца ў буфетныя аддзяленні, дзе сервіраваць стол у адпаведнасці з прызначанымі дыетамі. Сутачнае меню пададзенае для азнаямлення нашым пацыентам на стэндзе інфармацыі ў кожнай сталоўцы і абнаўляецца штодня. Тым пацыентам, хто з аб'ектыўных прычын не можа наведаць сталовую - стравы падаюць у палату да ложка на падносах ў талерках.

Фота з выявай прадуктаў харчавання ў выглядзе «бутэрброда» пададзенае адным з нашых пацыентаў, з'яўляецца яго асабістай інтэрпрэтацыяй і аналагічныя фота могуць быць выкладзеныя ў сетку кім хочаце, тым самым даючы нагоду для неабгрунтаваных і не вартых абмеркаванняў наведвальнікамі розных груп.

Да таго ж, фота з запечаным бульбай, белым хлебам і каўбасой адпавядае меню (падвячорак) ад 28.11.2019 года, аднак не адпавядае форме падачы...

Паважаныя каментатары! Людзі трапляюць у шпіталь для лячэння. Харчаванне ў нас дыетычнае, і варта адзначыць, што ніхто з пацыентаў не выказаў свае незадаволенасці пра аб'ёмы порцый і смакавыя якасці прыгатаваных і пададзеных страў. Магчыма, многім падасца выкарыстанне ў рацыёне груцы, праса, грэчкі, аўсянкі нявартымі для харчавання пацыентаў, але чаму не з'яўляюцца фота з прыгатаванымі рыбным, курыным суфле, катлетамі, пловам, запяканкамі з тварагу, гуляшу, тушанай гародніны, якія гатуюцца на спецыяльных плітах, у параканвектаматах?

Прапануем для прагляду фота страў вячэры буфетнага аддзялення і сервіроўкі сталоў

Смачна есці!!!

Здароўя, добрага настрою і пазітыву.

З павагай, адміністрацыя УАЗ «Слонімская ЦРБ»