Барыс Джонсан створыць міністэрства ў справах межаў ды іміграцыі
- 15.12.2019, 21:25
- 6,734
Прэм'ер-міністр Вялікабрытаніі таксама хоча аб'яднаць некалькі міністэрстваў.
Прэм'ер-міністр Вялікабрытаніі Барыс Джонсан мае намер заснаваць новае міністэрства, якое будзе адказваць за пытанні іміграцыі і аховы межаў каралеўства. Пра гэта паведамляе РБК-Украіна са спасылкай на газету The Times.
Паведамляецца, што мэтай стварэння новага ведамства з'яўляецца забеспячэнне бяспекі краіны пасля Brexit, калі Вялікабрытанія можа страціць доступ да баз звестак Еўрапола, а таксама забеспячэнне максімальна эфектыўнай працы новай візавай сістэмы, заснаванай на балах.
Акрамя таго, Джонсан мае намер не толькі вывесці візавыя і іміграцыйныя пытанні з кампетэнцыі брытанскага Міністэрства ўнутраных спраў, але таксама аб'яднае Міністэрства замежнага гандлю з Міністэрствам у справах бізнэсу, энэргетыкі і прамысловай стратэгіі. Гэтае ведамства будзе як адказваць за ўкладанне гандлёвых угод з іншымі краінамі пасля Brexit, так і працаваць над паляпшэннем эканамічнай сітуацыі на поўначы Англіі.
Міністэрства ў пытаннях міжнароднага развіцця зноў увальецца ў склад МЗС, дзякуючы гэтаму ўрад Джонсана зможа лепш спалучаць ажыццяўленне гуманітарных праграм з выкананнем замежнапалітычных задач.