Як чыноўнік з Браслава прыдумаў хітрую схему прысвойваць грошы ЕЗ

Намеснік старшыні райвыканкама прызнаў віну і раскаяўся.

Суд Глыбоцкага раёна вынес прыгавор былому намесніку Браслаўскага райвыканкама Міхаілу Пліско. 34-гадовага чыноўніка абвінавачвалі ў перавышэнні службовых паўнамоцтваў, піша «Салідарнасць».

Як паведамляе сайт Вярхоўнага суда, абвінавачаны «ўчыняў злачынствы супраць інтарэсаў дружбы з красавіка 2015 года па травень 2018-га».

Згодна з матэрыяламі справы, чыноўнік прыдумаў, як займець грошы, выдзеленыя Еўразвязам Браслаўскаму райвыканкаму для аплаты працы каманды рэалізацыі Міжнароднага праекта.

Для гэтага з удзельнікаў праекта былі абраныя людзі, якія залежалі ад яго па службе. Яны павінны былі дзяліцца з Пліско і двума яго калегамі-змоўшчыкамі прэміямі, якія атрымалі за працу над праектам.

Для міжнароднага праекта знайшлі нават ілжэбухгалтараў: з фіктыўнымі работнікамі ўклалі дамовы падраду, напраўду ніхто бухгалтэрыю не вёў.

У выніку Пліско і яго двум змоўшчыкам удалося завалодаць сумай больш за 63 000 рублёў, з якіх чыноўніку дасталася блізу 14 000.

Акрамя таго, былы чыноўнік забраў сабе частку прэмій, выдзеленых Браслаўскаму раёну за перамогу ў спаборніцтвах.

Абвінавачаны прызнаў віну цалкам і раскаяўся ва ўчыненым злачынстве, гаворыцца ў паведамленні суда. Яму прызначанае пакаранне ў выглядзе пазбаўлення волі на тэрмін 3 гады 6 месяцаў з адтэрміноўкай пакарання на 3 гады.

Прысуд у законнае дзеянне не ўвайшоў і можа быць абскарджаны.