Вынесены прысуд самаму вядомаму фігуранту «маскоўскай справы» Ягору Жукаву

Студэнта-палітолага актыўна падтрымліваў рэпер Oxxxymiron.

Кунцаўскі суд Масквы прысудзіў да трох гадоў пазбаўлення волі ўмоўна студэнта-палітолага Вышэйшай школы эканомікі 21-гадовага Ягора Жукава з пазбаўленнем права займацца дзейнасцю, звязанай з адміністраваннем інтэрнэт-сайтаў, на два гады. Такую пастанову вынесла суддзя Святлана Ухналёва, паведамляе карэспандэнт РБК.

Суд вызначыў лёс канфіскаваных у Жукава рэчдокаў: штатыў, ноўтбук і фотаапарат яму пастаноўлена вярнуць, а лібертарыянскі сцяг і тры керамічныя фігуркі жабаў – знішчыць.

Пракурор запытваў для Жукава чатыры гады рэальнага тэрміну ў калоніі. Суд пастанавіў даказаным, што Жукаў «здзейсніў публічныя заклікі да экстрэмісцкай дзейнасці», імкнучыся завабіць у яе «неабмежаванае кола карыстальнікаў інтэрнэту». У відэароліках у блогу Жукава суд выявіў «заклікі да змены ўлады ў Расеі, у тым ліку гвалтоўным шляхам», а таксама заклікі да такіх спосабаў бунту, як нявыплата падаткаў або выраб фальшывых грошай, адзначыла Ухналёва. Суддзя спаслалася на высновы экспертаў-крыміналістаў, запрошаных да справы следствам: яны адзначылі, што ў відэароліках Жукава прысутнічае «ідэя нянавісці да ўлады як крыніцы бедаў насельніцтва».

Меркаванне абароны пра тое, што ўстановавыя эксперты не валодаюць неабходнай кваліфікацыяй і адукацыяй, суд меркаваў надуманымі. «Указанне абароны на тэндэнцыйнасць следства не знаходзіць свайго аб'ектыўнага пацверджання», – таксама падсумавала Ухналёва.

Падтрымаць Жукава на суд прыйшлі галоўны рэдактар «Новай газеты» Дзмітрый Муратаў, прарэктарка ВШЭ Валерыя Касамара, сустаршыня Маскоўскай хельсінкскай групы Валерый Баршчоў, акторка Чулпан Хаматава, рэпер Oxxxymiron. У будынку суда ў часе пасяджэння сабраліся дзясяткі чалавек, якія скандавалі «адпускай» і «прысуд усяму пакаленню».

Ягор Жукаў – самы вядомы фігурант «справы 27 ліпеня», распачатай у дачыненні да ўдзельнікаў акцый пратэсту супраць адмовы рэгістраваць апазіцыйных кандыдатаў у Масгардуму. Ён аўтар палітычнага відэаблога. Пасля арышту Жукава асабістыя паручальніцтвы за яго падпісалі 612 чалавек, у тым ліку больш за 300 выкладчыкаў ВШЭ.

Раней на судах студэнта падтрымлівалі акторка Чулпан Хаматава, пісьменнік Дзмітрый Быкаў і рэпер Oxxxymiron – апошні быў гатовы ўнесці за Жукава заклад 2 млн руб. Галоўныя рэдактары «Эхо Москвы» і «Новай газеты» Аляксей Венедыктаў і Дзмітрый Муратаў далі суду гарантыю, што ў выпадку вызвалення Жукава гатовыя ўзяць яго на працу.

Жукаў быў затрыманы 2 жніўня паводле абвінавачвання ва ўдзеле ў масавых беспарадках (арт. 212 КК). Федэральныя тэлеканалы тады апублікавалі відэа, дзе малады чалавек, падобны на Жукава, падчас акцыі пратэсту робіць перад мітынгоўцамі накіроўчыя рухі рукамі. Праз месяц «Новая газета» апублікавала доказы, што гэтым маладым чалавекам быў не Жукаў. На наступны дзень у арыштаванага студэнта дома прайшоў новы ператрус, падчас якога сілавікі канфіскавалі флэшкі з ягонымі вучэбнымі праектамі і агітацыяй (Жукаў вылучаўся на выбарах у Масгардуму), штатыў, кашулю, лібертарыянскі сцяг і фігурку трох жабаў.

Праз некалькі дзён у дачыненні да Жукава спынілі справу аб масавых беспарадках, але завялі новую – пра заклікі да экстрэмісцкай дзейнасці ў інтэрнэце (арт. 280 КК). Абвінавачванне было заснаванае на чатырох відэазапісах, дзе Жукаў разважае пра эфектыўнасць негвалтоўнага пратэсту і, на думку следства, выказвае «пачуццё палітычнай нянавісці і варожасці да існага ў Расейскай Федэрацыі канстытуцыйнага ладу», пісала «Медыязона».

Судовы працэс паводле справы Жукава пачаўся 3 снежня і закончыўся за два паседжанні, кожнае з якіх доўжылася 10–12 гадзінаў з перапынкамі на эвакуацыю праз паведамленні аб выбуховым прыстасаванні. На працэсе выступілі два сведкі – эксперты з установавых інстытутаў СК і ФСБ, што прагледзелі ролікі з блога Жукава і выявілі ў іх заклікі да гвалтоўнай змены ўлады ў Расеі.

На хадайніцтва абаронцаў Жукава ў суд прыйшлі вядучая навуковая супрацоўніца сектара тэарэтычнай семантыкі Інстытута расейскай мовы імя В. Вінаградава РАН Ірына Лявонціна і былая супрацоўніца Маскоўскага даследчага цэнтра пры Дэпартаменце рэгіянальнай бяспекі і процідзеяння карупцыі ўрада Масквы Юлія Сафонава. Нягледзячы на навуковы стаж некалькі дзесяцігоддзяў, суд засумняваўся ў іх кваліфікацыі.

У сваім апошнім слове Жукаў заявіў, што, на ягоную думку, «адзіная сацыяльная палітыка, якую паслядоўна праводзіць расейская дзяржава, – гэта раз'яднанне». «Я сапраўды жадаю бачыць у сваіх грамадзянах дзве гэтыя якасці – адказнасць і любоў. Адказнасць за сябе, за тых, хто побач, за ўсю краіну. Любоў да слабога, да блізкага, да чалавецтва. Гэтае маё жаданне – яшчэ адна прычына, чаму я не мог заклікаць да гвалту. Гвалт развязвае рукі, вядзе да беспакаранасці, а значыць і да безадказнасці. Роўна гэтак сама гвалт не вядзе да любові», – заявіў Жукаў.