Ангела Мэркель упершыню наведала Аўшвіц
5- 6.12.2019, 15:41
- 9,111
Канцлерка Нямеччыны і прэм'ер Польшчы ўсклалі кветкі ў былым канцлагеры.
Канцлерка Нямеччыны Ангела Мэркель і прэм'ер-міністр Польшчы Матэвуш Маравецкі ўсклалі кветкі ля Сцены выканання прысудаў у былым канцлагеры «Аўшвіц». Такім чынам, яны ўшанавалі памяць усіх ахвяр нямецкага лагера смерці, паведамляе «Радыё Польшча».
Палітыкі таксама наведалі частку выставы ў музеі «Аўшвіц». Яны пабылі ля будынка 1-га крэматорыя, а таксама ўвайшлі ў 4-ты блок, у якім прадстаўлены довады масавага вынішчэння габрэяў.
У 5-м блоку ім былі паказаныя рэчы, аднятыя ў забітых габрэяў, якіх немцы масава дэпартавалі з акупаваных імі краін. У музеі «Аўшвіц» захоўваецца абутак, дзіцячае адзенне, акуляры, кухонная начынне, валізкі з імяннымі таблічкамі і малітоўныя халаты.
Гэта першы візіт Ангелы Мэркель у былы нямецкі канцлагер блізу Асвенціма. Канцлерка Нямеччыны была запрошаная Фондам «Аўшвіц-Біркенаў», які сёння, 6 снежня, адзначае 10-ю гадавіну свайго стварэння.