У Мексіцы выявілі радовішча нафты аб'ёмам паўмільярда бараляў

Гэтае адкрыццё назвалі самым важным за апошнія 40 гадоў.

Мексіканская дзяржаўная нафтагазавая і нафтахімічная кампанія Petróleos Mexicanos (Pemex) выявіла на сушы ў штаце Табаска на паўднёвым усходзе краіны буйное радовішча нафты, якое атрымала назву «Кескі». Пра гэта паведамляе выданне El Universal (пераклад – РБК).

«Мы можам пацвердзіць вам, спадар прэзідэнт, наяўнасць гіганцкага радовішча аб'ёмам 500 млн бар. нафтавага эквіваленту паводле катэгорыі 3P (даказаныя, верагодныя і магчымыя запасы. – РБК)», – сказаў генеральны дырэктар кампаніі Актавіа Рамэра Арапеса.

Pemex назвала гэтае адкрыццё самым важным з усіх, зробленых на поўдні краіны ў перыяд з 1987 года.

У лістападзе 2017 года Pemex абвесціла пра выяўленне «найважнейшага» за апошнія 15 гадоў нафтавага радовішча ў раёне Касамалоапан у штаце Веракрус, якое знаходзіцца за 72 км на поўдзень ад аднайменнага порта Веракрус. Запасы ацанілі на 1,5 млрд бар.

Папярэдні прэзідэнт Мексікі Энрыке Пенья Ньета казаў, што кампанія сутыкнулася з падзеннем узроўню здабычы нафты. На той момант узровень здабычы нафты «ў найлепшым выпадку» дасягаў 2,1 млн бар. за дзень.