У Ганконгу праходзіць самы масавы за апошнія месяцы пратэст

Тысячы дэманстрантаў выйшлі ў парк Вікторыі ў цэнтры горада.

У Ганконгу ў нядзелю, 8 снежня, аднавіліся масавыя антыўрадавыя пратэсты, што пачаліся роўна паўгода таму. Тысячы дэманстрантаў выйшлі ў парк Вікторыі ў цэнтры Ганконга, адкуль накіраваліся маршам у дзелавы раён. Акцыя стала самай масавай за апошнія некалькі месяцаў і першай з сярэдзіны жніўня, якую дазволіла правесці паліцыя, паведамляе dw.com.

Заяўку на правядзенне мітынгу падаў праваабарончы рух Civil Human Rights Front (CHRF), які аб'ядноўвае розныя ганконскія арганізацыі. Ініцыятары акцыі абвясцілі, што пратэст будзе мірным. Паліцыя ў сваю чаргу заявіла пра гатоўнасць душыць гвалт з боку дэманстрантаў.

Чаго патрабуюць пратэстоўцы ў Ганконгу?

Масавыя пратэсты ў Ганконгу пачаліся ў чэрвені праз планы ўлад дазволіць экстрадыцыю меркаваных злачынцаў у Кітай. Пазней адпаведны закон быў скасаваны, але мітынгі працягнуліся. Дэманстранты незадаволеныя ўзмацненнем уплыву Пекіна ў іх горадзе, які захаваў значныя свабоды па ўмовах яго вяртання Кітаю брытанскімі каланіяльнымі ўладамі.

Актывісты патрабуюць свабодных выбараў, незалежнага расследавання выпадкаў паліцэйскай жорсткасці, вызвалення затрыманых на папярэдніх акцыях актывістаў і адстаўкі кіраўніка адміністрацыі Ганконга Кэры Лам, якую абвінавачваюць у празмернай блізкасці да ўладаў КНР.

У канцы лістапада ў Ганконгу адбыліся мясцовыя выбары ў раённыя рады, апазіцыя перамагла з вялікім адрывам пры рэкордным прыходзе. Раней парады кантралявалі прапекінскія палітычныя сілы.