21 студзеня 2020, aўторак, 16:43
Засталося зусім крыху
Рубрыкі

Лекару прызначылі датэрміновую пенсію, а праз два гады скасавалі

9
Лекару прызначылі датэрміновую пенсію, а праз два гады скасавалі

Медык звярнулася ў суд.

Лекарцы-анколагу адной з бальніц Менска ў 2016 годзе прызначылі пенсію па ўзросце за работу з асаблівымі ўмовамі працы, а ў 2018-м - скасавалі і перавялі на звычайную працоўную, піша tut.by.

Пасля гэтага медык спрабавала абскардзіць пастанову камітэта працы, занятасці і сацабароны Менгарвыканкама, а потым звярнулася ў суд. У Вярхоўным судзе распавялі, чым скончылася гэтая гісторыя з прызначэннем пенсіі.

Мянчанка працавала лекарам-анколагам анкалагічнага аддзялення з 10 чэрвеня 1991 года да 31 ліпеня 2001 года ў 2-й гарадской клінічнай бальніцы Менска. У лютым 2016 года ёй прызначылі пенсію па ўзросце за работу з асаблівымі ўмовамі працы.

Аднак у чэрвені мінулага года камісія прызначэння пенсій пры адміністрацыі Савецкага раёна Менска скасавала рашэнне аб прызначэнні пенсіі па ўзросце за работу з асаблівымі ўмовамі працы. Жанчыне прызначылі звычайную пенсію па ўзросце (з даты дасягнення агульнаўстаноўленага пенсіённага ўзросту).

Прычына - «першаснымі дакументамі наймальніка не была пацверджаная яе занятасць на працягу поўнага працоўнага дня толькі лячэннем анкалагічных хворых з прымяненнем хіміятэрапеўтычных прэпаратаў, аператыўнымі ўмяшаннямі і маніпуляцыямі», тлумачаць у Вярхоўным судзе. Прасцей кажучы, пенсію па ўзросце за работу з асаблівымі ўмовамі працы скасавалі праз тое, што лекарка-анколаг нібыта працавала не поўны працоўны дзень у асаблівых умовах працы.

Лекарка-анколаг спачатку абскардзіла гэтую пастанову ў камітэце працы, занятасці і сацабароны Менгарвыканкама, а потым - у судзе Савецкага раёна Менска. У абодвух выпадках у задавальненні скаргі медыку адмовілі.

У сакавіку сёлета судовая калегія грамадзянскіх спраў Менскага гарадскога суда скасавала пастанову суда Савецкага раёна і вынесла новую пастанову. Скаргу лекаркі-анколага прызналі абгрунтаванай, а пастанову камітэта працы, занятасці і сацыяльнай абароне Менгарвыканкама - неправамернай.

У жніўні мінулага года гэта пастанову пакінулі без змены пастановай прэзідыўма Менскага гарадскога суда.

Пасля гэтага да развязання сітуацыі падключылася Генпракуратура. Намеснік гэтага ведамства ў пратэсце ставіў пытанне аб скасаванні пастановы Менскага гарадскога суда і прасіў пакінуць у сіле тую, якую вынес суд Савецкага раёна. Прадстаўнік Генпракуратуры намагаў, што адсутнічаюць довады працы лекаркі-анколага з асаблівымі ўмовамі працы поўны працоўны дзень.

- Судовая калегія Вярхоўнага суда, праверыўшы матэрыялы справы, абмеркаваўшы довады пратэсту, прыйшла да высновы аб тым, што судовыя пастановы, што аспрэчваюцца, адпавядаюць патрабаванням заканадаўства і падстаў для іх скасавання не маецца, - паведамляюць у Вярхоўным судзе.

Пры праверцы высветлілася, што пасада лекара-анколага была ўключаная ў пералік працоўных месцаў, якія даюць права на пенсію па ўзросце за работу з асаблівымі ўмовамі працы. Прычына - лекарка-анколаг «выконвала аперацыі анкалагічным хворым і выкарыстоўвала пры лячэнні пацыентаў аддзялення супрацьпухлінныя хіміяпрэпараты», удакладняюць у Вярхоўным судзе. «Такім чынам, заяўнік мела права на пенсію па ўзросце за работу з асаблівымі ўмовамі працы пры ўмове занятасці на гэтых працах поўны працоўны дзень», - тлумачаць у Вярхоўным судзе.

У выніку ў кастрычніку гэтага года судовая калегія грамадзянскіх спраў Вярхоўнага суда пакінула пратэст намесніка Генпракурора без задавальнення, а лекарцы-анколагу аднавілі выплату пенсіі за работу з асаблівымі ўмовамі працы.