Да станка і пад ялінку

Чаму ўлады не хочуць даваць беларусам выходны 31 снежня.

Разумееце, у нас традыцыя: кожны год 31 снежня мы з сябрамі ходзім на працу, працуем, піша «БелГазета». Ну, гэта даўно павялося, разумееце. У сувязі з гэтым шчыра абураныя петыцыямі, якія з'явіліся ў інтэрнэце з патрабаваннямі зрабіць выходнымі не толькі 1-2 студзеня, але і 31 снежня. Калі не толькі 1-2 студзеня, але і 31 снежня выходны, то калі працаваць?

Сапраўды, такая петыцыя ёсць, яна сабрала больш за 15 тысяч подпісаў, але яна не адлюстроўвае, як высветлілася, меркаванні працоўных. Пра гэта паведаміў прэм'ер-міністр Сяргей Румас, яшчэ ў лістападзе, ён абяцаў разгледзець чалабітную грамадзян.

Відавочна, Сяргей Мікалаевіч добра і вельмі глыбока вывучыў пытанне аб тым, у якой плоскасці ляжаць народныя планы на 31 снежня. І таму яго адказ прагучаў разумна, аргументавана, абнадзейвальна. Відаць, што чалавек расце як прамоўца і як палітык тэмпамі, апераджальнымі тэмпы росту беларускай эканомікі: «Што да 31 снежня, урад не падтрымлівае ўстанаўленне яго выходным праз рознага кшталту прычыны, вытворчыя і дзесьці асабістыя. Не ведаю, як у вашых калектывах праводзіцца Новы год, у большасці апытаных калектываў не хацелі б пазбаўляцца працоўнага дня 31 снежня для таго, каб мець магчымасць павіншаваць сваіх калег з Новым годам».

Калі працоўныя калектывы просяць не пазбаўляць іх радасці яднання на вытворчых плошчах у апошні дзень старога года, то, вядома, трэба ўсё пакінуць як ёсць. Хоць бы ў імя стабільнасці.