«Хуткая» ў Беларусі будзе прыязджаць крыху пазней

Улады змянілі правілы.

У Беларусі падрыхтавалі пастанову, якая падзеліць усе выклікі «хуткай дапамогі» толькі на дзве катэгорыі (раней іх было тры): экстраныя і неадкладныя выпадкі. Таксама яна ўвядзе паняцце «час чакання».

Пра гэта паведаміў Аляксандр Жынко, галоўны лекар Гарадской станцыі хуткай медыцынскай дапамогі, піша БелТА.

Да гэтага моманту дзейнічала наступнае правіла: экстраны выклік (напрыклад, пажары, атручэнне хімічнымі прэпаратамі і іншыя) перадаваўся ад дыспетчара свабоднай брыгадзе цягам чатырох хвілін пасля рэгістрацыі. А час прыбыцця брыгады на месца ў межах горада быў не пазней за 15 хвілін. Усяго выходзіла 19 хвілін - максімальны час чакання «хуткай». Цяпер жа гэты час зменіцца: ён будзе 20 хвілін у межах горада і паўгадзіны за яго межамі. А час перадачы выклікаў таксама адкарэктуюць: тэрміновы выклік - не пазней за 15 хвілін, неадкладны - не пазней за гадзіну.

Аляксандр Жынко таксама адзначыў, што ў лютым гэтага года пройдзе акцыя «Саступі дарогу хуткай». Яе правядзе ДАІ, а накіраваная яна будзе на тое, каб лішні раз нагадаць кіроўцам, што машыны спецыяльнага прызначэння трэба прапускаць. На думку галоўнага лекара, «хуткая дапамога» не сутыкаецца з праблемамі на дарозе. Акрамя таго, запаркаванасць двароў, з яго слоў, таксама не абцяжарвае машыне шлях да пад'езду.