Рост коштаў прадуктаў у Расеі пабіў 4-гадовы рэкорд

Для асобных прадуктаў рост коштаў абагнаў інфляцыю ў 3-10 разоў.

Рост коштаў прадуктаў у Расеі прадаўжае паскарацца, разганяючы інфляцыю. За снежань харчовыя тавары падаражэлі на 1,7%, а ў студзені - яшчэ на 1,2%, вынікае са звестак Расстата, паведамляе finanz.ru.

Назапашаным вынікам за два месяцы набор прадуктаў з афіцыйнага спажывецкага кошыку падаражэў на 2,9%, чаго афіцыйная статыстыка не фіксавала ні разу з пачатку 2015 года.

У гадавым вылічэнні на пачатак лютага рост харчовых коштаў паскорыўся да 5,64%, а для асобных прадуктаў абагнаў інфляцыю ў 3-10 разоў.

За снежань садавіна і гародніна падаражэлі на 8,9%, яйкі - на 15,4%, хлеб і масла - на 1,1%, макаронныя вырабы, мяса і птушка - на 1%, а малако - на 0,9% .

У студзені на 4,8% падскочылі кошты проса, яблыкі дадалі ў кошце яшчэ 4,6%, морква і цыбуля - 7,9%, капуста - 15,3%, агуркі - 16,5%, памідоры - больш за 20% . Яшчэ на 1,1% падаражэў хлеб, на 1% - цукар, на 1,9% - мука.

Ва ўсіх гэтых катэгорыях рост коштаў быў у асноўным абумоўлены паслабленнем рубля і павелічэннем выдаткаў вытворцаў, пішуць аналітыкі «Ашчадбанка CIB»: у 2018 годзе кошты збожжавых выраслі на 25%, што прывяло да падаражання кармоў і павялічыла сабекошт унутры вытворчага ланцужка.

Акрамя таго, адбіваецца адкладзены эфект падвышэння коштаў бензіну і рост ПДВ. Нарэшце, у 2019 годзе ў 3-8 разоў вырасце тарыф за пакаванне прадукцыі: экалагічны збор будуць плаціць вытворцы пластмасавай, пластыкавай і лёгкай металічнай упакоўкі, нагадвае аналітык «Альпары» Ганна Бадрова: «Гэта значыць, што істотным чынам (вышэй за падвышэнне стаўкі ПДВ) вырастуць кошты замарожанай прадукцыі, а таксама газаваныя напоі і малочныя прадукты».

Прадукты даражэюць, бо ў мінулым яны таннелі, тлумачыць ЦБ РФ у пятнічным каментары да вызначэння што да ключавой стаўкі.

«Паскарэнне харчовай інфляцыі носіць шмат у чым аднаўленчы характар пасля яе істотнага зніжэння ў другой палове 2017 - першай палове 2018 года. Акрамя таго, канчаецца падгонка коштаў да паслаблення рубля, якое адбылося ў другім паўгоддзі 2018 года», - канстатуе ЦБ.

Пры гэтым менавіта рост коштаў прадуктаў харчавання «адыграў істотную ролю ў павышэнні інфляцыі», дадае рэгулятар. Яна, нагадаем, згодна з Расстатам, на пачатак лютага дасягнула 5% супраць 2,2% у студзені мінулага года.

Рост коштаў мог бы быць яшчэ вышэйшым, калі б не падзенне даходаў насельніцтва: людзі вымушаныя эканоміць на нехарчовых таварах, што не дае рытэйлерам прыкметна падымаць цэннікі, адзначаюць у «Ашчадбанку CIB».

Так, за студзень па-за прадуктовым сегментам кошты выраслі на 0,64%, а назапашаным вынікам за два месяцы - менш чым на 1%.