«Хадзіў з нажом па трэцім паверсе, барыкадавалі дзверы»

Падрабязнасці надзвычайнага здарэння ў Стоўбцах, дзе дзесяцікласнік напаў на настаўніцу і школьнікаў.

Каля сярэдняй школы №2, дзе сёння вучань 10-га класа напаў на настаўніцу і аднакласнікаў, цяпер дзяжурыць міліцыя, вучняў выпускаюць з будынка па чарзе. Настаўнікі папрасілі бацькоў забраць дзяцей, паведамляюць карэспандэнты tut.by з месца здарэння.

Каля школы цяпер супрацоўнікі міліцыі, журналісты, родныя дзяцей. На месца прыехаў кіраўнік СК Іван Наскевіч.

- Паводле папярэдніх звестак, падазраваны ў нападзе вучань 10-га класа прыйшоў у школу блізу 7:40. Ён паставіў партфель і выйшаў з кабінета. Затым вярнуўся і напаў на настаўніцу гісторыі, якая павінна была весці першы ўрок. За педагога паспрабавалі заступіцца два аднакласнікі. Яны атрымалі раненні. Пасля гэтага падазраваны выбег з класа і зайшоў у суседні кабінет, дзе напаў на вучня 11-га класа. 17 — гадовы школьнік у выніку нападу загінуў, - паведаміў афіцыйны прадстаўнік Следчага камітэта Сяргей Кабаковіч.

Ён таксама дадаў, што загінулай настаўніцы было 50 гадоў. Два пацярпелыя дзесяцікласнікі знаходзяцца ў лякарні, іх стан ацэньваецца як стабільны.

«Саша быў разумніца, вельмі мэтанакіраваны хлопчык»

Марына, сястра аднаго з вучняў 10 «Б» класа, у якім і адбылася трагедыя, самотна стаіць ля школы. Класная кіраўніца 10 «Б» патэлефанавала бацькам і папрасіла забраць дзяцей. Іх выпускаюць з будынку па чарзе. Заняткі ў школе скасаваныя.

Загінулага хлопчыка звалі Аляксандр, ён вучыўся ў 11-м класе.

«Саша быў разумніца, вельмі мэтанакіраваны хлопчык. Добра вучыўся, не бываў у дрэнных кампаніях. Ён вучыў гісторыю і хацеў паступаць у Польшчу на палітолага» — распавялі родныя загінулага падлетка.

Неўзабаве пасля таго, як бацька Сашы прывёз яго ў школу, яму патэлефанавалі і паведамілі пра напад. Хлопчык памёр на ягоных руках праз пяць хвілін пасля таго, як мужчына пасля званка кінуўся ў школу.

Удар прыйшоўся Сашу ззаду ў шыю. Мяркуюць, што нападнік цэліўся туды свядома. Пакуль не вядома, ці былі знаёмыя паміж сабой падазраваны ў нападзе і загінулы хлопчык.

І загінулы, і пацярпелыя хлопчыкі добра вучыліся, былі выдатнікамі.

«Хадзіў з нажом па трэцім паверсе, барыкадавалі дзверы»

Ірына, настаўніца пачатковых класаў, забірае сваё дзіця са школы. Сям'ю нападніка Вадзіма яна апісвае як добрую і прыстойную, якая «ніколі ні на якім уліку не стаяла». У гэтай жа школе вучыцца малодшая сястра падлетка.

- Хлопчык вельмі спакойны, для многіх шок, што такое адбылося. І вучыўся ён добра.

Загінулую настаўніцу гісторыі Ірына апісвае як вельмі добрую спецыялістку і чалавека.

- Падрыхтавала шмат прызёраў алімпіяд. І як чалавек яна ніколі не імкнулася пакараць дзіця ацэнкай, заўсёды давала шанец выправіць.

Са слоў настаўніцы, прычыну здарэння ніхто не ведае.

- Вадзім заходзіў ва ўсе класы, дзе можна было адчыніць дзверы. Нават барыкадавалі дзверы, потым хадзіў з нажом па трэцім паверсе, пакуль яго не заўважылі і не патэлефанавалі ў міліцыю. Спачатку зайшоў у адзін клас, потым у другі. Хацеў збегчы праз чорны ход - ён выявіўся зачыненым. Таму на першым паверсе ён адкрыў акно - і ўцёк. Затрымалі каля гаспадарчай крамы.

Міліцыя, са слоў Ірыны, зрэагавала імгненна - была на месцы ўжо праз тры хвіліны, «хуткая» ехала даўжэй.

- Мая сяброўка надавала першую дапамогу…

«Пераехалі ў Стоўбцы некалькі гадоў таму»

У доме сям'і нападніка цяпер працуе міліцыя. Калега бацькі хлопца распавядае, што сям'я паехала сюды некалькі гадоў таму, пабудавалі дом:

— Бацька — нармальны мужык, камунікатыўны, жонка - прыемная жанчына.

Іншы сусед кажа, што хлопец вельмі спакойны.

- Хадзіў сабе ў школу ды хадзіў. Не біўся, не хуліганіў. Усё было нармальна. Я калі прачытаў, што здарылася, у мяне, дарослага чалавека, аж мурашкі па спіне пайшлі: як такое наогул магло адбыцца?

Раніцай 11 лютага блізу 8 раніцы вучань УА «Сярэдняя школа №2» у райцэнтры нанёс нажавыя раненні настаўніцы і траім школьнікам.

«Выкладчык і адзін з падлеткаў ад атрыманых пашкоджанняў памерлі, яшчэ двое непаўналетніх хлопчыкаў былі аператыўна дастаўленыя ў лякарню», — паведамілі ва УУС Менаблвыканкама.

Нападнік уцёк, у шасці раёнах Менскай вобласці быў уведзены спецыяльны план «Сірэна».

Паводле папярэдніх звестак, нападніку 15 гадоў, ён вучань 10-га класа. Перад нападам ён выдаліў свае старонкі ў сацсетках.

Пазней у МУС паведамілі, што падлетка затрымалі супрацоўнікі крымінальнага вышуку пры падтрымцы АМАПа.

«Падлетка затрымалі а 10:10 падчас маштабнай адпрацоўкі горада», — дадалі ва УУС Менаблвыканкама.

«Раніцай 11 лютага ў міліцыю паступіла паведамленне аб тым, што старшакласнік падчас раптоўнага канфлікту прычыніў нажавыя раненні настаўніцы і некалькім вучням. Ад атрыманых раненняў настаўніца і адзін вучань памерлі. Акрамя таго, яшчэ два школьнікі шпіталізаваныя. УСК Менскай вобласці распачатая крымінальная справа аб факце забойства дзвюх асоб», — распавялі ў прэс-службе Следчага камітэта.

Там таксама дадалі, што расследаванне крымінальнай справы ўзятае на асабісты кантроль кіраўніком СК Іванам Наскевічам.

Са слоў відавочцаў, вучань уварваўся ў клас з нажом і ўдарыў ім настаўніцу ў шыю. Пасля нападу школьнік выскачыў з акна другога паверха і ўцёк. У школе яго ахарактарызавалі як вельмі ціхага і спакойнага.