Танкеры, якія загарэліся ля берагоў Крыма ў студзені, дагэтуль не патушаныя
7- 11.02.2019, 20:02
- 14,429
Пажар на суднах, якія перавозілі звадкаваны газ, працягваецца ўжо 22 дні.
Танкеры Candy і Maestro са звадкаваным газам, якія загарэліся ў Чорным моры 21 студзеня, дагэтуль не патушаныя. Пра гэта 11 лютага паведаміў «Интерфакс» са спасылкай на словы прэс-сакратара Расмаррэчфлота.
Судны гараць ужо 22 дні. Спікер ведамства расказаў выданню, што марскі буксір «Меркурый» па чарзе арашае судны, але на адным з танкераў застаецца яшчэ чатыры ачагі гарэння, на другім - два.
Прадстаўнік Расмаррэчфлота не стаў прагназаваць, калі спыніцца пажар. З ягоных слоў, гэта можа працягвацца «тыдзень-два», пакуль не выгарыць паліва.
21 студзеня на адным з суднаў у раёне Керчанскай пратокі адбыўся выбух, затым пачаўся пажар. Полымя перакінулася на іншае судна. На борце суднаў Candy і Maestro знаходзілася 32 грамадзяніны Турцыі і Індыі. 12 з іх выратавалі, цела 10 знайшлі, астатнія прапалі без вестак.
Пажар, як мяркуецца, пачаўся падчас перапампоўкі паліва.
У Міністэрстве пытання часова акупаваных тэрыторый Украіны са спасылкай на звесткі офіса кантролю за замежнымі актывамі міністэрства фінансаў ЗША паведамілі, што судны Maestro і Candy з 2016 года былі задзейнічаныя ў незаконных пастаўках газу ў Сірыю. У ведамстве падкрэслілі, што на абодвух суднах была адключаная сістэма ідэнтыфікацыі.
Раніцай 22 студзеня выратавальную аперацыю завяршылі, бо знайсці тых, хто выжыў надзеі не засталося.
Следчы камітэт Расеі кваліфікаваў гібель людзей у выніку пажару на двух суднах у раёне Керчанскай пратокі як прычыненне смерці праз неасцярожнасць.
25 студзеня за бальніцу ў акупаванай Керчы выпісалі 12 выратаваных маракоў. Паводле інфармацыі «Міністэрства аховы здароўя» Крыма, іх стан здавальняючы.