Расейская фірма «кінула» гарадзенскія заводы на 180 тысяч даляраў
11- 15.02.2019, 18:12
- 15,809
Спачатку фірма з падмаскоўнай Балашыхі некалькі гадоў закупляла малочную прадукцыю ад гарадзенскага прадпрыемства, а потым абвясціла пра банкруцтва.
Як паведамляе «Вечерний Гродно» са спасылкай на Камітэт дзяржкантролю, камерцыйнае прадпрыемства, зарэгістраванае ў Падмаскоўі, шчыльна супрацоўнічала з беларускімі «малочнымі вытворцамі», між іншым з Дзятлаўскім сыраробным заводам і ваўкавыскім «Беллактам». Прадукцыю расейская фірма закупляла, каб у далейшым рэалізоўваць яе ў Расеі пад сваёй гандлёвай маркай.
У чэрвені 2018 расейцы чарговым разам атрымалі партыю малочнай прадукцыі, аднак дырэктар фірмы не разлічыўся з пастаўшчыкамі, з дня ў дзень абяцаючы пагасіць запазычанасць. Тым не менш, беларускія прадпрыемствы працягнулі адпускаць малочную прадукцыю без аплаты, а адно з іх - з перавышэннем устаноўленага страхавой дамовай ліміту. У выніку агульная запазычанасць кампаніі перад вытворцамі з Гарадзенскай вобласці склала 12 млн расейскіх рублёў (180 тысяч даляраў).
- Перамовы аб пытанні вяртання запазычанасці не прынеслі выніку - дырэктар расейскай фірмы не спяшаўся выконваць свае абяцанні. У жніўні 2018 года камерцыйнае прадпрыемства нечакана для сваіх партнёраў абвясціла пра ліквідацыю, а крыху пазней - пра банкруцтва, - дадалі ў ведамстве.
У студзені 2019 года пракуратурай Дзятлаўскага раёна ў дачыненні да дырэктара была распачатая крымінальная справа паводле ч.4 арт.209 КК РБ. Акрамя таго, дзеянні службовых асоб з беларускіх прадпрыемстваў, якія ўдзельнічалі ва ўгодах, правераць на законнасць.