Навукоўцы стварылі ўнікальны сродак, які амалоджвае мозг
6- 16.02.2019, 11:26
- 19,845
Даследаванне дае надзею на лячэнне страты памяці і разумовых парушэнняў.
Навукоўцы канадскага Цэнтра наркалогіі ды псіхічнага здароўя пры Універсітэце Таронта стварылі эксперыментальны прэпарат, які падтрымлівае клеткі мозгу, якія старэюць, паляпшае памяць і працу мозгу.
Пра гэта піша The Guardian.
Адзначаецца, што даследаванне дае надзею на лячэнне страты памяці і разумовых парушэнняў, якія часта сустракаюцца ў сталым веку.
Мяркуецца, што такі эфект будзе мець усяго адна таблетка на дзень для людзей, старэйшых за 55 гадоў.
Выпрабаванні ў лабараторыі паказалі, што ў старых мышэй значна лепш працавала памяць ужо праз паўгадзіны пасля прыёму прэпарата. Навукоўцы ўстанавілі, што пасля двух месяцаў лячэння клеткі мозгу, якія скараціліся ў старых жывёл, аднавілі да ўзроўню «маладога» мозгу.
Эцьен Сібіл, адна з даследчыц Цэнтра, патлумачыла, што лячэнне можа быць накіраванае не толькі на «нармальнае» зніжэнне кагнітыўных функцый, але і на страту памяці і разумовыя парушэнні, якія звычайна зазнаюць людзі з дэпрэсіяй, шызафрэніяй і хваробай Альцгеймера.
Прэпарат - вытворнае бензадыязэпіна. Ён можа патрапіць на рынак, калі клінічныя выпрабаванні, якія пачынаюцца цягам двух гадоў, пакажуць, што прэпарат бяспечны і эфектыўны для людзей.
Са слоў Сібіл, карысць ад гэтага прэпарата можа ў перспектыве атрымаць кожны чалавек сталага веку. Разам з гэтым адзначаецца, што прэпарат можа прадухіляць «старэнне» мозгу, аднак не можа выратаваць ад дэменцыі, якая ўжо развілася ў чалавека.