Б'ёрндален: Дар’я здольная выступаць на высокім узроўні яшчэ шмат гадоў
21- 18.02.2019, 12:14
- 14,155
Нарвэжскі біятланіст выказаўся аб магчымым вяртанні Домрачавай у вялікі спорт.
Васьміразовы алімпійскі чэмпіён, былы нарвэжскі біятланіст Оле-Эйнар Б'ёрндален расказаў пра тое, што ягоная жонка беларуска Дар'я Домрачава можа выступаць на высокім узроўні яшчэ шмат гадоў, піша rsport.ria.ru.
- У адным з першых інтэрв'ю Ваша жонка прызналася мне, што самым яскравым і магутным ейным уражаннем на Гульнях у Ванкувэры ў 2010-м стала не бронза, здабытая ў індывідуальнай гонцы, а той факт, што вялікі Оле-Эйнар Б'ёрндален падышоў яе з гэтым медалём павіншаваць. Домрачава ўжо тады Вам падабалася?
- Я запомніў яе ў той гонцы толькі таму, што ў яе зусім абы-як дзейнічалі лыжы. Наогул не ехалі. Але пры гэтым яна змагалася так заўзята, што на гэта было немагчыма не звярнуць увагі і не захапіцца. Ведаеце, бываюць гонкі, у якіх чалавек не здабывае залаты медаль, але ўсе, хто ў тэме, выдатна разумеюць, што сапраўдны пераможца - менавіта ён. Гэта быў той самы выпадак.
- Вы хацелі б зноў убачыць Дар'ю ў спаборніцтвах?
- Мне б вельмі не хацелася думаць, што жонка скончыла бегаць дзеля мяне. Болей, яна зрабіла гэта дзеля Ксеніі. Мы шмат разоў абмяркоўвалі з ёй гэтую тэму, але канчатковую пастанову Дар’я прымала самастойна. Шчыра вам скажу, гэта быў нечаканы для мяне момант: я амаль ужо пераканаўся ў тым, што жонка бегацьме далей - мне здавалася, яна схіляецца менавіта да гэтага. І тут яна мяне ашаламаніла. Ці захоча яна гэтую пастанову змяніць і вярнуцца ў спорт? З майго пункту гледжання, у гэтым няма ніякіх праблем. Яна здольная выступаць на высокім узроўні яшчэ шмат гадоў.
- Але ці жадаеце гэтага Вы самі?
- Калі захоча Дар’я? Вядома ж, я яе падтрымаю. Я цалкам усведамляю, што такія біятланісткі, як яна, вельмі рэдка з'яўляюцца ў спорце. Гаворка не толькі пра рухальны талент, але і пра ўменне спаборнічаць, уменне ментальна супрацьстаяць усялякім абставінам. Так, мы маем маленькае дзіця, і, спадзяюся, будуць яшчэ дзеці, але спорт - гэта такая кароткая гісторыя...
- І Вы гатовыя ўзяць клопат пра дачку на сябе?
- Вядома.
- Хто ў вашай сям'і гатуе ежу?
- Мы абое. Кожны мае свае фірмовыя стравы, так што гэта не праблема. Да таго ж я проста люблю гатаваць. Мая мама была выдатнай кухарка, так што я атрымаў вельмі правільнае з кулінарнага пункту гледжання выхаванне. Штодзень мама нешта пякла і, колькі сябе памятаю, дзверы ў наш дом ніколі не зачынялася. Заходзіў паштальён, нават калі ў яго не было для нас карэспандэнцыі, зазіралі суседзі, і ўсім заўсёды даставаўся кубачак кавы і кавалак пірага. Адпаведна я ўмею пячы, смачна гатаваць усякае мяса.
- Вашая сям'я праўда мела дзевяць кароў?
- Дзевяць кароў, дзве свінні, процьму іншай жывёлы. Прадукты мы ніколі не куплялі, усё мелі сваё.
- І Вы ўмееце даіць?
- А што тут такога? Мы мелі адмысловы агрэгат, але перш чым яго ўмыкаць, трэба было падрыхтаваць карову, раздаіць яе ўручную, каб не траўмаваць вымя. Думаю, гэтым уменнем валодае кожнае сялянскае дзіцё.