Уладзімір Зяленскі: Украіне патрэбныя новыя ідэі

Як выглядае праграма кандыдата ў прэзідэнты Украіны.

Са слоў Уладзіміра Зяленскага, на сёння Украіна мае патрэбу не проста ў новых асобах, а ў новых ідэях, піша сайт тэлеканала 112.

"Я раскажу вам пра Украіну сваёй мары". Так пачынаецца перадвыбарчая праграма кандыдата ў прэзідэнты Украіны Уладзіміра Зяленскага.

Лідар "95 квартала" - адзін з фаварытаў прэзідэнцкай гонкі-2019. Паводле шэрагу нядаўніх апытанняў ён знаходзіцца на першым месцы і ўзначальвае групу лідараў, якія прэтэндуюць на выхад у другі тур.

Дарэчы, усяго кандыдатаў у прэзідэнты 44.

Агульныя паняцці

Уладзімір Зяленскі хоча, каб Украіна была краінай, дзе бізнэс "можна адкрыць за гадзіну, атрымаць замежны пашпарт – за 15 хвілін, а прагаласаваць на выбарах – за адну секунду".

Таксама ў "Украіне мары" Зяленскага "лекары і настаўнікі атрымліваюць рэальны заробак, а карупцыянеры – рэальныя тэрміны", а "бабуля атрымлівае годную пенсію, а не інфаркт ад рахунку за камуналку".

Цяпер па пунктах.

Замежная палітыка

Уладзімір Зяленскі збіраецца прасіць падтрымку ў гарантаў Будапешцкага мемарандума і партнёраў Еўразвязу ў трох пунктах:

А) У імкненні скончыць вайну.

Б) Вярнуць часова акупаваныя тэрыторыі.

У) Прымусіць агрэсара кампенсаваць прычыненую шкоду.

Цытата з праграмы:

"Рух Украіны ў NATO і іншыя аб'яднанні - залог нашай бяспекі, у якую я веру і якая павінна атрымаць пацверджанне праз Усеўкраінскі рэферэндум".

Кандыдат у прэзідэнты таксама заяўляе, што бачыць сваёй задачай устанаўленне заробку вайскоўцам "на ўзроўні натаўскіх стандартаў".

Першы законапраект

Ён будзе называцца "аб народаўладдзі". Сутнасць законапраекта, апісаная ў праграме, наступная: замацаванне механізму, паводле якога "народ Украіны будзе фармаваць асноўныя задачы для ўлады праз рэферэндумы і іншыя формы наўпроставай дэмакратыі".

Гэта ўсё плануецца зрабіць "з максімальным выкарыстаннем найноўшых тэхналогій".

Яшчэ законапраекты:

Акрамя згаданага вышэй Уладзімір Зяленскі абяцае падаць у Вярхоўную Раду яшчэ некалькі законапраектаў:

- "Аб зняцці недатыкальнасці з прэзідэнта Украіны, народных дэпутатаў і суддзяў".

- "Аб імпічменце прэзідэнта Украіны".

- "Аб адкліканні народнага дэпутата Украіны".

Цытата з праграмы:

"Выбары ў парламент і мясцовыя рады павінны адбывацца на падставе адкрытых спісах. Націсканне кнопак, дэпутацкія прагулы - аўтаматычная падстава для пазбаўлення дэпутацкага мандата".

Суды і праваахоўныя органы

Цытата з праграмы:

"Мы вернем давер і павагу да суду. Для простых спрэчак - міравыя суддзі, якія выбіраюцца народам. Для крымінальных злачынстваў - эфектыўны суд прысяжных, які складаецца з народа".

Уладзімір Зяленскі таксама абяцае, што СБУ не будзе займацца эканамічнымі злачынствамі.

Эканоміка

Кандыдат у прэзідэнты абяцае "нулявую дэкларацыю" для бізнэсу. Сутнасць: "Кожны бізнэсовец за 5% зможа задэклараваць і легалізаваць свае даходы".

Акрамя гэтага:

- Замена падатку на прыбытак падаткам на выведзены капітал.

- Фармаванне празрыстага рынку зямлі.

- Пераход Украіны на забеспячэнне сваіх патрэбаў за кошт уласных энэргетычных рэсурсаў.

І яшчэ сярод планаў - эканамічны пашпарт украінца.

Цытата з праграмы:

"Кожнае дзіця мае права назапашваць на сваім рахунку частку ад рэалізацыі дзяржавай прыродных выгод (нетры, землі і г.д.). Пасля дасягнення паўналецця дзіця атрымае гэтыя назапашванні як уласны стартавы капітал".

Барацьба з карупцыяй

Дакладней, як абвяшчае фармулёўка ў перадвыбарнай праграме Зяленскага,"перамога над ёй".

Таму пункты плана кандыдата наступныя:

- Падазраваны ў карупцыі не выйдзе пад заклад.

- Асуджаны за карупцыю атрымае канфіскацыю маёмасці і пажыццёвую забарону займаць дзяржаўныя пасады.

- Выкрывальнік карупцыі будзе знаходзіцца пад абаронай дзяржавы і атрымліваць матэрыяльнае заахвочванне.

Цытата з праграмы:

"Сумленныя чыноўнікі атрымаюць гарантаваныя годныя заробкі, адкрытыя конкурсы на пасады, высокі сацыяльны статус і дзяржаўнае страхаванне".

"Мая мэта - поўная адкрытасць дзейнасці ўлады, аўтаматызацыя публічных працэсаў онлайн, звядзенне ўсяго функцыяналу дзяржавы да памераў смартфона".

Медыцына і адукацыя

Цытата з праграмы:

"Прафесіі лекара і настаўніка павінны стаць прэстыжнымі і высокааплатнымі".

Уладзімір Зяленскі абяцае лякарням і школам сучаснае абсталяванне і абнаўленне інфраструктуры.

Таксама агучаны план пераходу да страхавой медыцыны. Згодна з праграмай кандыдата, пацыент будзе сам вызначаць праграму страхавання, выбіраць установу, лекара і спосаб лячэння.

Пры гэтым базавы ўзровень страхавання для малазабяспечаных слаёў насельніцтва - за кошт дзяржавы.

Акрамя гэтага:

- Увядзенне абавязковага бясплатнага штогадовага медагляду.

- Праграма папулярызацыі здаровага ладу жыцця.

Цытата з праграмы:

"Лекі, якія прайшлі рэгістрацыю ў краінах ЕЗ і ЗША, не будуць атрымліваць дадатковых дазволаў ва Украіне".

Тэма адукацыі апісаная ў перадвыбарнай праграме як "будучыня нацыі".

Уладзімір Зяленскі абяцае ўвядзенне адукацыйнага ваўчара, які працуе паводле прынцыпу "грошы ходзяць за таленавітым студэнтам".

Цытата з праграмы:

"Кожны школьны геній атрымае адукацыйны ваўчар, які зможа выдаткаваць на навучанне ва ўсякай абранай ім установе вышэйшай адукацыі".

Таксама сярод абяцанняў - адкрыццё ўкраінскага рынку для найлепшых замежных навучальных устаноў.

І яшчэ з важнага

- Аднаўленне праграмы моладзевага жыллёвага крэдытавання.

- Дзяржаўная падтрымка і год льготнага падаткаабкладання для маладых прадпрымальнікаў.

- Пераход ад салідарнай да назапашвальнай пенсійнай сістэмы.

- Манетызацыя льгот і субсідый.

- Аднаўленне аэрапортаў у кожным абласным цэнтры.

- Падпісанне пагаднення "Адкрытае неба" з ЕЗ.

- Забеспячэнне доступу ўсіх жыхароў да хуткага інтэрнэту.

- Аўтаматызацыя публічных працэсаў.

Цытата з праграмы:

"Уся інфармацыя аб фармаванні і выкарыстанні бюджэтаў, правядзенні тэндэраў, закупак, аўкцыёнаў будзе даступная ўсім".