Беларусы ірванулі на заробкі ў краіны Балтыі

Кім яны там працуюць.

Рэкордная колькасць беларусаў з'ехала ў 2018 годзе на заробкі. У топ-3 краін, у якія паводле афіцыйных звестак часцей за ўсё адпраўляюцца «па рубель» нашы суайчыннікі, уваходзіць Літва, піша tut.by. Пры гэтым за мінулы год колькасць беларускіх працоўных мігрантаў, якія выехалі ў гэтую краіну, вырасла ўтрая. У іншыя балтыйскія краіны - Латвію і Эстонію — на заробкі, паводле інфармацыі беларускага боку, выязджаюць адзінкі. Але звесткі краін, якія прымаюць, адрозніваюцца ў разы ў вялікі бок.

Журналісты паглядзелі, колькі беларусаў і дзе працуюць у Балтыйскіх краінах.

Літва: беларусы ідуць у муляры, бетоншчыкі і ў кухары

На першае паўгоддзе 2019-га ў пераліку дэфіцытных прафесій значацца кіроўца міжнародных грузавых транспартных перавозак, зваршчык, зборшчык металічных карпусоў судна, швачкі, забойшчык жывёлы, мяснік, бетоншчык, электрык, будаўнік шырокага профілю, аднаўляльнік будаўнічых лясоў, тынкоўшчык — дэкаратар, ізаліроўшчык.

- У гэты спіс уносяцца прадстаўнікі прафесій, якія маюць права на працу будучы на тэрыторыі Літоўскай Рэспублікі без дазволу на працу — распавяла прадстаўніца прэс-службы літоўскай біржы працы пры Міністэрстве сацыяльнай абароны і працы Мілда Янкаўскене.

З яе слоў, «да 2017 года беларусы больш за ўсё ўладкоўваліся кіроўцамі міжнародных перавозак, зваршчыкамі, будаўнікамі».

- У 2018 годзе больш за ўсё выдадзена дазволаў для муляраў, бетоншчыкаў, сталяроў, кухараў рэстарацый, мантажнікаў, сантэхнікаў, слесараў аўтамабіляў і іншых прафесій, — удакладніла Мілда Янкаўскене.

Тым, хто хоча ўладкавацца на працу ў Літве па дэфіцытнай прафесіі, трэба атрымаць дазвол на часовае пражыванне альбо шматразовую нацыянальную візу, адзначаюць у Дэпартаменце міграцыі пры МУС гэтай краіны.

Для працаўладкавання ў Літве патрабуецца дазвол на працу, атрымаць які неабходна да прыбыцця ў краіну. «Працадаўца, які мае намер уладкаваць на працу замежнага грамадзяніна, абавязаны звярнуцца на тэрытарыяльную біржу працы і зарэгістраваць свабоднае працоўнае месца, — адзначаюць у літоўскай біржы працы. - Заява працадаўцы з просьбай аб выдачы дазволу на працу ў Літоўскай Рэспубліцы не разглядаецца, калі за 14 дзён да падачы на тэрытарыяльную біржу працы заявы ён не зарэгістраваў вольнага працоўнага месца ў адпаведнасці з устаноўленым прававымі актамі парадкам»

Агулам жа на літоўскім рынку працы, на падставе прагнозаў мясцовай службы занятасці, расце попыт на інжынераў, ІТ-спецыялістаў. З кваліфікаваных работнікаў больш за ўсё літоўскім наймальнікам патрэбныя кіроўцы цяжкавікоў і грузавых машын, мяснікі, наладчыкі і аператары станкоў у апрацоўцы металу, швачкі, кушняры і шапачнікі, будаўнікі, кіроўцы аўтобусаў і тралейбусаў, абіўцы мэблі. Але калі прафесія не ўваходзіць у спіс дэфіцытных, то замежнаму спецыялісту трэба атрымліваць дазвол на працаўладкаванне.

Складаней жа за ўсё знайсці працу, паводле звестак літоўскай службы занятасці, у сектары адміністравання і выканаўчым сектары, у сектары ўліку і бухгалтэрыі. Няшмат прапаноў таксама для дызайнераў, аператараў збору звестак, біёлагаў, батанікаў і заолагаў, дэкаратараў, сакратароў, спартовых трэнераў, перакладчыкаў, журналістаў, ахоўнікаў, фларыстаў, цырульнікаў, касметолагаў, кіроўцаў легкавых аўто, таксовак і фургонаў.

Нагадаем, раней літоўскія фермеры скардзіліся, што не могуць знайсці працоўных на заробак 1000 еўраў. Сярод тых, хто адгукнуўся на вакансіі, выявіліся і беларусы.

У Літве на пачатак гэтага года пражывала 12 162 беларусаў, адзначаюць у Дэпартаменце міграцыі пры МУС гэтай краіны. Гэта на 31,8% больш, чым годам раней.

Якія заробкі. У Літве сярэдні заробак брута (да падаткаў), уключаючы індывідуальныя прадпрыемствы, вырас у 2018 годзе на 200 рублёў — да 2275 рублёў. Сярэднямесячны заробак нета (пасля выплаты падаткаў) вырас на 143 рублі - да 1774 рублёў.

Латвія: Беларусы запатрабаваныя ў будаўніцтве і ІТ

Колькасць беларусаў, якія працаўладкоўваюцца на латышскіх прадпрыемствах, расце. Так, калі ў 2016 годзе дазвол на працаўладкаванне ў гэтай краіне атрымалі 1018 нашых суайчыннікаў, у 2017-м - 1230, то ў 2018-м - 1824, паведамілі ва ўправе ў справах грамадзянства і міграцыі Латвіі. Да прыкладу, у 2017 годзе беларусы занялі другое месца ў колькасці працоўных мігрантаў у Латвіі (першае - украінцы).

Тыповы гастарбайтар у Латвіі - гэта мужчына з Украіны ці Беларусі, які працуе дальнабойнікам або працуе ў сферы IT. У 2017 годзе працаваць у Латвію часцей за ўсё прыязджалі грамадзяне Расеі, Украіны, Беларусі ды Азербайджана.

- Часцей за ўсё беларусы працаўладкоўваюцца на наземны транспарт і трубаправодны транспарт, а таксама ў будаўнічыя арганізацыі. Працаўладкоўваюцца ў арганізацыі кампутарнага праграмавання, кансультацый і спадарожнай дзейнасці», — паведаміў прадстаўнік управы спраў грамадзянства і міграцыі Латвіі Марыс Гарбуноўс.

Ва ўправе адзначаюць, што ў Латвіі існуюць спрошчаныя правілы працаўладкавання для высокакваліфікаванай рабочай сілы з іншых краін.

Латышскі працадаўца, які хоча запрасіць на працу замежніка, спачатку павінен размясціць вакансію на 30 дзён на сайце дзяржагенцтва занятасці. Выключэнне робяць толькі ў некаторых прафесіях - педагогі, мастакі, спецыялісты ў грамадзянскай авіяцыі, а таксама для ўладальнікаў «сініх карт» (вакансіі размяшчаюцца на сайце дзяржагенцтва занятасці на 10 дзён). Яшчэ адно патрабаванне для працадаўцаў у прыёме замежнікаў — яны павінны забяспечыць ім заробак, не меншы за сярэдні ў краіне за мінулы год (у трэцім квартале 2018 года — 1006 еўраў да выліку падаткаў).

Латвійскія працадаўцы ўжо не першы год называюць сітуацыю на рынку працы драматычнай. Гэта пацвярджае статыстыка: сярэдні ўзровень заробкаў у краіне расце (у трэцім квартале 2018 года - на 8% у параўнанні з 2017-м), і адной з галоўных прычын уважаецца дэфіцыт кадраў. Узровень беспрацоўя ў снежні склаў 6,4%.

Другі важны момант - гэта адмоўнае міграцыйнае сальда цягам доўгіх гадоў. З 1 траўня 2004 года, калі Латвія ўступіла ў ЕЗ, з краіны з'ехала не менш за 300 тысяч жыхароў. Дагэтуль краіна штогод губляе блізу 18-20 тысяч чалавек, і ўсе спробы выраўнаваць адмоўнае сальда міграцыі пры дапамозе палітыкі рээміграцыі пакуль не даюць прыкметнага эфекту.

За апошнія сем гадоў агульная колькасць выдадзеных дазволаў на працу ў Латвіі для грамадзян трэціх краін вырасла больш чым у чатыры разы.

Міністэрства эканомікі Латвіі падлічыла попыт на працоўную сілу да 2030 года ва ўсіх галінах. Да 2022 года попыт на работнікаў у краіне агулам вырасце на 5,7% у параўнанні з 2015 годам. Рынку працы спатрэбіцца прыкладна 35 тысяч новых работнікаў, а да 2030 года гэтая колькасць вырасце да 85 тысяч. Самая вострая сітуацыя паўстане ў апрацоўчай прамысловасці, гандлі і IT-сектары.

Якія заробкі. У Латвіі ў трэцім квартале 2018 года сярэдні брута-заробак склаў 2485 рублёў, а сярэдні нэта-заробак — 1912 рублёў (звесткі за 4-ы квартал пакуль не апублікаваныя).

Эстонія: больш за 1110 беларусаў знайшлі працу ў 2018 годзе

У Эстоніі летась працаўладкавалася 1112 беларусаў, якія атрымалі дазвол на рэгістрацыю для кароткачасовай працы (тэрмінам да 12 месяцаў).

Паводле звестак Дэпартамента статыстыкі Эстоніі, больш за ўсё свабодных працоўных месцаў у сферы догляду і дапамогі (3,4%) і фінансаў і страхавання (2,7%), а менш за ўсё ў сферы нерухомасці (0,3%) і горнай прамысловасці (0,1%), паведамляе rus.delfi.ee. Так, у трэцім квартале 2018 года ў Эстоніі было 11 400 свабодных працоўных месцаў.

Колькі беларусаў працаўладкавалася. Паводле звестак Дэпартамента міграцыі і грамадзянства МУС, у Эстоніі летась уладкаваліся на працу 11 беларусаў, а паводле інфармацыі эстонскага боку — 1112 чалавек.