Defense Aerospace: ЗША замарозілі пастаўку F-35 Турцыі
2- 21.02.2019, 17:20
- 12,708
Анкара прадаўжае набываць у Расеі сістэмы СПА С-400.
ЗША замарозілі пастаўку Турцыі знішчальнікаў новага пакалення F-35 праз намеры Анкары закупіць у Расеі сістэмы супрацьпаветранай абароны С-400. Адпаведны законапраект аб урадавых выдатках быў падпісаны прэзідэнтам ЗША Дональдам Трампам у аўторак, паведамляе Defense Aerospace, (пераклад - Newsader). Згодна з дакументам, забарона на перадачу турэцкаму боку найноўшых стэлс-самалётаў будзе дзейнічаць як мінімум датуль, пакуль дзяржсакратар і міністр абароны не апублікуюць даклад, у якім будзе дадзены каментар што да ўгоды паміж РФ і Турцыяй аб продажы С-400.
Як чакаецца, новыя даклады ў гэтым пытанні будуць прадстаўленыя Кангрэсу да 1 лістапада гэтага года. Падпісаны Трампам законапраект прадугледжвае, што вайсковае і замежнапалітычнае міністэрства прадставяць падрабязны план увядзення санкцый супраць Анкары ў выпадку рэалізацыі праграмы С-400.
У сваёй ранейшай справаздачы Кангрэсу Пентагон у адказ на ўгоду, якая тычыцца С-400, прыстрашыў Анкару поўным выключэннем яе праграмы F-35 і прыпыненнем іншых вайсковых паставак з Амерыкі: Турцыя можа пазбавіцца кантракту на закупку верталётаў CH-47F Chinook і UH-60 Black Hawk , а таксама самалётаў F-16. Гэты ж дакумент патрабуе заблакаваць продаж зброі службе аховы Эрдагана праз напад яе супрацоўнікаў на мітынгоўцаў у Нью-Ёрку ў 2017 годзе.
Амерыканскія прадстаўнікі занепакоеныя тым, што ў выпадку адначасовай закупкі Турцыяй F-35 і С-400 Масква зможа атрымаць праз туркаў доступ да адчувальнай інфармацыі аб слабых месцах F-35.