«Дармаедскі» дэкрэт №3 суду не падведамасны

З беззаконнем уладаў трэба змагацца.

Суддзя суда Чыгуначнага раёна Гомеля Дзмітрый Дзябой адмовіў жыхарцы Гомеля Марыі Тарасенцы ў распачынанні справы паводле скаргі на ўключэнне так званай «дармаедскай камісіяй» яе звестак у базу не занятых у эканоміцы, паведамляе «Гомельская весна».

І хоць вызначэнне раённага суддзі ў законнае дзеянне не ўвайшло, адмова суда хвалюе сёння не менш паўмільёна беларусаў, якіх улада аднесла да гэтай катэгорыі і мае намер прадаваць паслугі ЖКГ на падставе эканамічна абгрунтаваных тарыфаў.

Са слоў Марыі, яна не выключала такі варыянт развіцця падзей, але ўсё ж спадзявалася, што суд возьмецца разглядаць яе заяву. Суразмоўніца паведаміла, што гарвыканкам і адміністрацыя Чыгуначнага раёна Гомеля, куды яна папярэдне звярталася са скаргамі, адправілі яе ў суд у выпадку нязгоды.

- Вось мы і звярнуліся. Але суд не прыняў скаргу з прычыны непадведамаснасці, - распавяла жанчына, якая ўжо аспрэчыла вызначэнне суддзі.

Праваабаронца Леанід Судаленка, які ініцыяваў першую скаргу не занятай у суд, адзначае, хоць абноўлены дэкрэт №3 не прадугледжвае абскарджанне грамадзянамі пастановы так званых дармаедскіх камісій, тым не менш суды абавязаны распачынаць такія справы.

З ягоных слоў, скарга ў суд утрымоўвала два патрабаванні: пастаноўкі пытання перад Канстытуцыйным судом пра не канстытуцыйнасць дэкрэта №3 Асноўнаму закону і выключэнне яе звестак з базы асоб, не занятых у эканоміцы.

- Адмаўляючы ў завядзенні справы суд пакінуў без разгляду першае патрабаванне. Паводле другога патрабавання суд абмежаваўся фармулёўкай «на вас не ўскладзена ніякіх абавязкаў». Будзем чакаць, якую ацэнку гэтай самадзейнасці дасць абласны суд, - адзначыў суразмоўца.

Праваабаронца прапануе ўсім, каго ўлада назвала «незанятым», прадаўжаць пісаць скаргі, у тым ліку і ў суды. Ён заяўляе, што ўжо пасля некалькіх тысяч такіх скаргаў улада перагледзіць сваё стаўленне да народжанай ёй жа праблемы - прымусіць беларуса працаваць за ежу.