Вольга Хіжынкова: Насамрэч Мілеўскі больш за ўсё ў жыцці любіць футбол

Інакш ён не гуляў бы да 34 гадоў.

Вядомая супермадэль, "Міс Беларусь-2008", а цяпер прэс-сакратарка берасцейскага "Дынама" Вольга Хіжынкова ў інтэрв'ю Прессболу падзялілася меркаваннем пра папулярнасць Арцёма Мілеўскага, у тым ліку за межамі футбольнага поля.

– Не ведаем, куды ідзе ваш клуб, але спадарожнікаў вы выбіраеце годных. Адзін Мілеўскі чаго варты.

– Памятаю, як успрынялі некаторыя заўзятары факт ягонага падпісання. Скепсіс пераважаў. Ах, навошта, ды ён жа столькі п'е... Усе чамусьці памяталі гісторыі з жоўтай прэсы, але забываліся, які ён гулец. І мне прыемна, што Арцём заваяваў сваё месца ў камандзе, стаў яе лідарам і любімцам фанатаў.

– Як табе апошняя праграма з ягоным удзелам?

– Жывая. Чалавек разняволіўся. Адчуваецца, што з аўтарамі ён знаёмы не з чутак, думаю, правёў багата часу ў розных цікавых установах Кіева.

– Іранізуеш?

– Зусім не. Любоў да багемнага жыцця – гэта частка Арцёма. Яму падабаецца стасункаваць, ён любіць быць душой кампаніі. Але трэба зразумець галоўнае, ён, дарэчы, сказаў пра гэта ў праграме. Маўляў, усе думаюць, што Мілеўскі любіць бухаць, але на самай справе больш за ўсё ў жыцці ён любіць футбол. Гэта тое, што атрымліваецца ў яго лепш за ўсё, і без гульні не было б нічога іншага – бабла, "ферары" і багатай геаграфіі сябровак.

І, дарэчы, не думаю, што ён такі вялікі аматар спіртных напояў, якім шмат каму падаецца. Інакш бы да 34 гадоў не гуляў. Мне здаецца, яму нават падабаецца эпатаваць публіку сваімі фота. Маўляў, хлопцы, я на адпачынку, у мяне ўсё добра, хутка буду.

– І сапраўды, неўзабаве ён зноў намаляваўся ў Берасці. Здзейсніўшы, трэба прызнацца, дзіўны камбэк. Цябе гэта ўзрадавала?

– Як чалавека і заўзятара – безумоўна. Жыццё ўжо не будзе ранейшым. Міля вярнуўся. Ну, а як у прэс-аташэ ў мяне да яго бываюць пытанні. Калі нечага не хоча рабіць, то ўсё. Упрэцца і ні ў якую. Але давай будзем уважаць гэта за праяву беларускага характару.