Пра якую працу мараць беларусы?
2- 23.02.2019, 17:55
- 11,064
Праца і грошы патрэбныя нашым суайчыннікам для выжывання.
Якія праблемы найбольш хвалююць беларусаў і на чыіх плячах, на іх думку, ляжыць адказнасць за іх дабрабыт, паказала даследаванне «Эканамічныя каштоўнасці насельніцтва Беларусі ў 2018 годзе», піша «Завтра твоей страны».
Галоўныя праблемы - эканамічныя
Эканамічныя праблемы ў жыцці беларусаў перавышаюць па значэнні ўсе астатнія.
- Знаходжанне эканамічных праблем у топе кажа пра тое, што амаль для паловы насельніцтва яны - найбольш балючыя і прыкметныя. Першая праблема - рост коштаў - натуральна, прыкладная. Але беспрацоўе, нізкі ўзровень даходаў, высокія кошты жыллёва-камунальных паслуг - гэта тычыцца многіх і выклікае ў людзей істотныя асцярогі, - тлумачыць аўтарка даследавання сацыёлаг Даследчага цэнтра ІПМ Дар'я Урбан.
Агулам эканамічныя праблемы больш актуальныя, чым алкагалізм, наркаманія, якасць адукацыі, злачыннасць.
Найбольш актуальныя сусветныя праблемы, на думку рэспандэнтаў, - беднасць, дрэннае здароўе насельніцтва, забруджванне навакольнага асяроддзя, вялікі разрыў паміж багатымі і беднымі і эканамічны крызіс.
Праца і грошы патрэбныя для выжывання
Грошы ў беларусаў у асноўным асацыююцца з працай, заробкам і магчымасцямі. Пры гэтым з грашыма асацыююць даляры і еўры і нашмат менш беларускія рублі.
- Шмат хто кажа, што грошы - гэта магчымасці. Але адначасова шмат і тых, хто адзначае, што гэта сродак выжывання і што грошай бракуе. І гэта сведчыць пра тое, у якім стане знаходзяцца даходы беларусаў, - распавядае Дар'я Урбан.
Прыкладна для паловы насельніцтва галоўная прычына працаваць - матэрыяльнае забеспячэнне. На другім месцы неабходнасць утрымліваць сям'ю, а на трэцім - пазіцыя, што працаваць павінны ўсе. Больш за ўсё беларусы хацелі б памяняць у сваёй працы яе аплату. Менш за ўсё - атрымаць больш адказнасці і магчымасці праяўляць ініцыятыву.
Найбольш актыўнай пазіцыяй што да працы валодаюць людзі ва ўзросце ад 18 да 29 гадоў. Чым старэйшыя рэспандэнты, тым больш сярод іх людзей з нізкай матывацыяй. Больш за ўсё людзей, якія аддаюць перавагу грашовай, але пры гэтым не напружанай працы сярод узроставай групы ад 30 да 44 гадоў. Гарантыі і зручнасць важнейшыя за ўсё для старэйшага пакалення.
Сярод тых, хто займаецца фізічнай працай, асноўная матывацыя працаваць - патрэба ў грошах (49,3%), неабходнасць утрымліваць сям'ю (25,2%) і таму, што ўсе павінны працаваць (17%). Сярод тых, хто займаецца разумовай працай, прыярытэты трохі адрозніваюцца. На першым месцы стаіць грашовая матывацыя (44,7%), на другім тое, што ўсе павінны працаваць (18,7%), на трэцім - неабходнасць утрымліваць сям'ю (16%). Пры гэтым тыя, хто займаецца ў асноўным разумовай працай, часцей хацелі б займацца чымсьці цікавым (9,2% супраць 2,7%).
Мець свой бізнэс хацелі б 42,2% насельніцтва, не хочуць - 54,1%, а 3,6% ужо маюць сваю справу. Прычым жаданне адкрыць бізнэс аднолькавае ў мужчын і жанчын, але сапраўднымі ўладальнікамі бізнэсу з'яўляюцца 5,9% мужчын і 1,8% жанчын.
Апытанне паказала, што грамадства дзеліцца на дзве групы. Першая (49,3% рэспандэнтаў) мяркуе, што для дасягнення багацця патрэбныя сувязі, багатыя бацькі, прадпрымальнасць і шанцаванне. Другая (50,7%) - называе важнымі працавітасць, розум, адукацыю і прадпрымальнасць. І ў гэтых групах няма асаблівых адрозненняў па полу, узросту ці месцы жыхарства.
Працавітасць як сродак атрымання багацця рэспандэнты ацанілі вышэй, чым у 2006 годзе. Шанцаванне ацэньваецца вышэй, чым адукацыя. Але ўсё ж больш за палову насельніцтва за важныя для атрымання багацця ўважаюць патрэбныя сувязі. Агулам вонкавыя фактары атрымання багацця (патрэбныя сувязі, шанцаванне, багатыя бацькі) уважаюцца за неабходныя сярод больш чым чвэрці насельніцтва.