У Чэхіі няма каму класці цэглу за €2000 у месяц

Чэхія мае вострую патрэбу ў кваліфікаваных муляраx.

Кваліфікаваны муляр ў Чэхіі атрымлівае паўтары-дзве тысячы еўраў.

Пра гэта піша Расейская служба «Чэшскага радыё».

Калі ў 2005 годзе гэтую прафесію асвойвала 705 чалавек, то ў 2018 годзе ў вучылішчах налічвалася ўсяго 253 будучыя муляры. Як паведамляе Асацыяцыя малых і сярэдніх прадпрыемстваў і рамеснікаў Чэхіі, колькасць выпускнікоў малярных і будаўнічых вучэльняў упала да крытычна нізкага паказчыка.

Сур'ёзнасць сітуацыі пацвярджае дырэктар Сярэдняй прафесійнай вучэльні Кладна Івана Седлакава:

«Магчыма, сваю ролю тут адыгрывае перакананне маладзёнаў, што яны могуць працаваць мулярамі і без дыплома, асвоіўшы гэтую прафесію на практыцы. Некаторыя фірмы, якія маюць патрэбу ў такіх рабочых, праводзяць іх паскоранае навучанне ці наймаюць працоўныя кадры з-за мяжы».

Як адзначаюць спецыялісты, прафесіі, якія патрабуюць фізічнай працы, не занадта папулярныя сярод чэшскай моладзі, якая імкнецца знайсці сабе выкарыстанне ў іншых галінах, якія яны ўважае за больш прэстыжныя.

Сваю ролю таксама адыгрывае шырокая прапанова на рынку працы рабочых з Украіны і будаўнічых брыгад, якія выконваюць працу «пад ключ». Гэта зніжае цікавасць чэшскіх фірм да падтрымкі навучальных устаноў, якія выпускаюць спецыялістаў будаўнічых прафесій. Як паведамляе Асацыяцыя, колькасць дыпламаваных выпускнікоў сталярных вучэльняў за апошнія 13 гадоў знізілася на 70%.

Пры гэтым, аднак, істотна вырасла цікавасць да атрымання дыплома ў спецыяльнасцях «машынабудаванне» і «электроніка».

«У гэтых галінах істотна выраслі заробкі, фірмы на такіх супрацоўніках не эканомяць, бо маюць вострую патрэбу ў электрыках. Такім чынам, гэтая прафесія становіцца ўсё больш прывабнай, і расце цікавасць да атрымання такога дыплома», - тлумачыць Івана Седлакава.