Сем новых правіл у аплаце паслуг ЖКГ

Што зменіцца для беларусаў з сакавіка.

З сакавіка плата за жыллёва-камунальныя паслугі ў Беларусі будзе налічвацца згодна з новымі правіламі, пішуць «Віцебскія Весці». Што канкрэтна закрануць гэтыя змены?

Нагадаем, што цяпер дзейнічае два тыпы тарыфаў – субсідаваныя дзяржавай і поўныя (100% кампенсацыі эканамічна абгрунтаваных выдаткаў).

1.Тэхнічнае абслугоўванне

Скасуюць паасобную плату за тэхнічнае абслугоўванне жылых дамоў, водазабеспячэнне, адвядзенне вады, электраэнэргію. Пакуль што субсідаваны тарыф за тэхнічнае абслугоўванне ўжываўся ў разліку 20 кв.м на чалавека, зарэгістраванага на месцы жыхарства платніка і ягоных сямейнікаў, плюс 10 кв.м на сям'ю. Цяпер плошча кватэры не будзе мець значэння - субсідаваны тарыф будзе ўжывацца на ўсю жылую плошчу, калі ў ёй зарэгістраваны хаця б адзін чалавек.

2. Водазабеспячэнне

Нормы на спажыванне вады скасуюць. Калі раней тарыфы на водазабеспячэнне (0,8338 рубля за 1 куб.м) і адвядзенне вады (0,6383 рубля за 1 куб.м) ужываліся ў разліку «да 140 літраў на дзень на аднаго зарэгістраванага», то цяпер паводле такіх тарыфаў трэба будзе плаціць за ўсю выкарыстаную ваду ў кватэры, дзе хто-небудзь зарэгістраваны і ёсць прылады індывідуальнага ўліку выдатку вады.

3. Ацяпленне і газ

Цяпер за ацяпленне паводле эканамічна абгрунтаваных тарыфаў будуць плаціць толькі ўласнікі кватэр, дзе ніхто не зарэгістраваны. Гэта ж правіла закране юрыдычных асоб, уласнікаў памяшканняў, у якіх знаходзіцца ПУП або якія здаюцца для кароткатэрміновага жыхарства.

4. Электраэнэргія

Да 2019 года за электраэнэргію плацілі грунтуючыся на ўстаноўленых аб'ёмах спажывання і абсталявання жытла электрычнымі або газавымі плітамі. Але калі ў кватэры не быў зарэгістраваны ўласнік або ягоныя сямейнікі, аплата вялася паводле 100% тарыфу. Цяпер паводле поўнага тарыфу будуць плаціць за кватэры, дзе ніхто не зарэгістраваны. Са студзеня скасавалі плату грунтуючыся на аб'ёмах спажывання электраэнэргіі. Тарыф на электраэнэргію адрозніваўся толькі для дамоў з электраплітамі (0,1484 рубля за 1 кВт⋅г) і з газам (0,1746 рубля за 1 кВт⋅г).

Пры гэтым, захаваецца падзел на дзённы і начны тарыфы, а таксама ў непрацоўныя і святочныя дні.

Тарыфы для дамоў без цэнтралізаванага цепла- і газазабеспячэння: у 2019 годзе была ўведзеная новая група тарыфаў для дамоў без цэнтралізаванага цепла- і газазабеспячэння (0,0335 рубля за 1 кВт*г), для іх аплата пазначаным тарыфам будзе ісці, калі ў жыллі хтосьці зарэгістраваны.

Тарыфы для дапаможных памяшканняў: цяпер для асвятлення дапаможных памяшканняў, дзейнасці абсталявання і ліфта разлічвацца будзе інакш. Калі пакуль што аплата ідзе паводле прылад уліку (не перавышаючы гранічна дапушчальных тарыфаў), то цяпер у паведамленні будзе стаяць сума паводле гранічна дапушчальных тарыфаў. Калі ў канцы года выявіцца, што ў канкрэтным доме спажылі менш электраэнэргіі, жыхарам у студзені будуць рабіць пераразлік і вяртаць пераплачаныя грошы.

5. Няправільныя тарыфы

Калі цяпер праз няправільныя тарыфы і даналічэнне платы за ЖКГ рабіўся пераразлік за ўвесь «няправільны» перыяд (але не больш, чым за 3 гады), то з сакавіка пераразлік можна будзе зрабіць толькі за 3 месяцы.

Калі памылка адбылася праз недакладныя звесткі спажыўца, будуць рабіць пераразлік за ўвесь перыяд (але не больш чым за 3 гады).

6. Дыстанцыйны ўлік

Калі ў доме можна дыстанцыйна здымаць паказчыкі прылад індывідуальнага ўліку камунальных паслуг, то цяпер карыстальніку не давядзецца здымаць паказчыкі лічыльнікаў. За яго гэта будзе рабіць сістэма.

7. Інтэрнат

Для жыхароў інтэрната плата за тэхнічнае абслугоўванне ліфта, санітарнае ўтрыманне дапаможных памяшканняў, кампенсацыю выдаткаў на электраэнэргію, спажытую на асвятленне дапаможных памяшканняў і дзейнасць абсталявання (у тым ліку ліфтаў), будзе ўлічвацца не паводле колькасці зарэгістраваных чалавек, а паводле колькасці грамадзян, названых у пагадненні найму (улічваюцца нават тыя, якія выбылі).