Лаўроў пра падпісанне мірнай дамовы з Японіяй: Умовы адсутнічаюць цалкам

Тым не менш МЗС РФ будзе прадаўжаць перамовы пра Курылы.

У цяперашні час адсутнічаюць умовы для падпісання мірнай дамовы паміж Японіяй і Расеяй, заявіў у інтэрв'ю "В'етнамскаму тэлебачанню" і кітайскім тэлеканалах ЦТВ і "Фенікс", апублікаваным 24 лютага на сайце Міністэрства замежных справаў Расеі, кіраўнік МЗС РФ Сяргей Лаўроў, паведамляе gordonua.com.

"Што тычыцца абвяшчэння японскай боку пра тое, якія ў іх планы ў дачыненні да чэрвеньскага візіту прэзідэнта Расеі Уладзіміра Пуціна ў Японію для ўдзелу ў саміце Вялікай дваццаткі і правядзенні чарговай сустрэчы з прэм'ер-міністрам Японіі Сіндзо Абэ, я пакідаю гэта на іхнім сумленні. Ніякіх дамоўленасцяў не было і не магло быць, таму што і мы ніколі не з'яўляемся прыхільнікамі нейкіх штучных тэрмінаў ні ў адной праблеме... Тым больш, што ніхто і ніколі не бачыў ніякіх рамачных праектаў", – заявіў Лаўроў.

Паводле ягоных словаў, "каб развязваць складаныя пытанні, неабходна забяспечыць не проста належную атмасферу, а рэальны змест стасункаў у эканоміцы, палітыцы, міжнародных справах".

"Калі мы паглядзім на рэальную сітуацыю, Абэ, выступаючы ў парламенце, кажа, што плануе абавязкова развязаць пытанне з мірнай дамовай на японскіх умовах. Слова гонару, не ведаю, адкуль у яго такое перакананне. Ні прэзідэнт Расеі Уладзімір Пуцін, ні я, ні хто-небудзь іншы з удзельнікаў расейска-японскіх кансультацый не даваў падставаў нашым японскім калегам для падобных заяваў. Тое, што ў Сінгапуры ў ходзе сустрэчы на палях саміту Вялікай дваццаткі Пуцін і Абэ абвесцілі пра неабходнасць паскорыць працу над мірнай дамовай на аснове дэкларацыі 1956 года, кажа пра адваротнае: мы вядзем размову не на японскіх умовах, а на ўмовах гэтага дакумента", – прадоўжыў кіраўнік МЗС Расеі.

Ён падкрэсліў, што ў дэкларацыі "выразна сказана: спачатку – падпісанне мірнай дамовы".

"А гэта, як я ўжо шматкроць казаў, азначае неабходнасць прызнання нашымі японскімі суседзямі вынікаў Другой сусветнай вайны ва ўсёй іх паўнаце, у тым ліку суверэнітэту Расейскай Федэрацыі над усімі Курыльскімі астравамі, уключаючы чатыры астравы Малой Курыльскай грады. Даволі дзіўна, што нашы японскія калегі не жадаюць згаджацца з вынікамі Другой сусветнай вайны ў тым выглядзе, у якім яны замацаваныя ў Статуце ААН. Там сказана, што ўсё, што зрабілі дзяржавы-пераможцы, не абмяркоўваецца. Нават калі ў японцаў ёсць свая інтэрпрэтацыя Сан-Францыскай мірнай дамовы і іншых дакументаў, якія тычацца гэтага рэгіёну, Статут ААН яны ратыфікавалі. Адклікаць сваю ратыфікацыю некарэктна. Так не атрымаецца", – прадоўжыў Лаўроў.

Ён таксама адзначыў, што Японія далучылася да шэрагу санкцый супраць Расейскай Федэрацыі, і "наўрад ці гэта можна ўважаць сяброўскай пазіцыяй".

"У ААН Японія галасуе салідарна з ЗША паводле ўсіх рэзалюцый, накіраваных супраць Расеі, выступае супраць або ўстрымліваецца датычна праектаў, якія прапануе Расейская Федэрацыя, – увогуле, каардынуе сваю пазіцыю ў ААН з Вашынгтонам. Мы не супраць таго, каб Японія супрацоўнічала з іншымі краінамі, але ЗША абвесцілі Расею галоўным ворагам – натуральна, разам з Кітаем... Тое, што ў японцаў ёсць вайсковы звяз з ЗША – гэта таксама немалаважны чыннік. Амерыканцы маюць права размяшчаць свае ўзброеныя сілы дзе заўгодна ў Японіі і ўжо размяшчаюць там сваю сістэму супрацьракетнай абароны, якая стварае рызыкі і для Расеі, і для Кітайскай Народнай Рэспублікі (мы шматкроць казалі пра гэта). Паўтару, гэта адбываецца ва ўмовах, калі ЗША абвяшчаюць нас сваім галоўным спаборнікам. Не бачыць таго, што замест абвешчанай мэты гэта не паляпшае, а моцна пагаршае якасць нашых стасункаў, было б не вельмі правільна", – сказаў Лаўроў.

Ён дадаў, што РФ гатова прадаўжаць дыялог.

«Перыядычна нам пасылаюць сігналы, што, як толькі мірная дамова будзе падпісаная на японскіх умовах, на нас пасыплецца манна нябесная ў выглядзе японскіх інвестыцый. Гэта не тое, пра што дамаўляліся. І апошняе. Сярод дамоўленасцей, як трэба паляпшаць якасць стасункаў, ёсць пункт пра неабходнасць ствараць у грамадскай думкі пазітыўны вобраз адно аднаму. Як было замацавана ў расейска-японскіх пагадненнях мінулых гадоў, пастанова датычна мірнай дамовы павінна быць такой, каб яна падтрымлівалася народамі абедзвюх краінаў. Калі ж у Японіі тэрміны "паўночныя тэрыторыі", "незаконная акупацыя" ўключаныя не толькі ў школьныя падручнікі, але і ў многія ўрадавыя дакументы... гэта якраз праца ў процілеглым кірунку... Мы будзем прадаўжаць карпатлівую працу, дамагаючыся выхаду на дамоўленасці, якія дазволяць стварыць умовы для такога развязання праблемы мірнай дамовы, якое будзе прымальнае для народаў абедзвюх краінаў. Пакуль мы бачым, што гэтыя ўмовы адсутнічаюць цалкам», – рэзюмаваў Лаўроў.

У кастрычніку 2018 года прэм'ер-міністр Японіі Сіндзо Абэ заявіў, што гатовы падпісаць мірную дамову з Расеяй, якая так і не была падпісаная паміж краінамі паводле вынікаў Другой сусветнай вайны, пасля таго як Курыльскія астравы ўвойдуць у склад Японіі.

У лістападзе на сустрэчы ў Сінгапуры з расейскім прэзідэнтам Уладзімірам Пуціным японскі прэм'ер паабяцаў, што ў выпадку перадачы Японіі астравоў з ліку Курыльскіх на іх не будуць размяшчаць вайсковыя базы ЗША.

Прэс-сакратар Крамля Дзмітрый Пяскоў заявіў у лістападзе, што пра аўтаматычную перадачу астравоў Японіі на перамовах гаворка не ідзе.

1 студзеня 2019 года Абэ адзначыў, што перадача Курыльскіх астравоў Японіі не павінна выклікаць праблемаў у грамадзянаў Расеі, якія жывуць на гэтай тэрыторыі.

8 студзеня японскае выданне Yomiuri Shimbun са спасылкай на крыніцы, блізкія да расейска-японскіх перамоваў, паведаміла, што Японія прапануе РФ адмовіцца ад узаемных кампенсацый датычна Курылаў.