Берасцейцы прыдумалі новую тактыку барацьбы з акумулятарным заводам
2- 24.02.2019, 12:56
- 19,061
Актыўнасць пратэстоўцаў узрасце.
Гарвыканкам Берасця зноў забараніў правядзенне чатырох мітынгаў супраць акумулятарнага завода. Два мітынгі намячаліся 23 і 24 лютага на пляцоўцы каля сцэны ў парку Воінаў-інтэрнацыяналістаў, якая вызначаная мясцовай уладай для правядзення масавых мерапрыемстваў, паведаміў «Брэсцкай Газеце» праваабаронца Раман Кісляк.
Апавяшчэнні на правядзенне мітынгаў жыхары Берасця, якія змагаюцца супраць акумулятарнага завода, падалі ў гарвыканкам яшчэ 8 лютага.
На пададзеныя апавяшчэнні Берасцейскі гарвыканкам адказаў, што правядзенне мітынгаў недапушчальнае ў сувязі з запланаванымі раней на гэтай пляцоўцы ў гэтыя дні мерапрыемствамі, прысвечанымі Дню абаронцаў Айчыны і Узброеных Сілаў Рэспублікі Беларусь.
«З пачатку сакавіка мы будзем падаваць паведамленні на правядзенне мітынгаў не толькі ў выходныя, але і ў буднія дні», – апавёў Раман Кісляк.
Заявак пададзена ўжо на 64 мітынгі, 13 дэманстрацый і 12 пікетаў. З іх лёс 8 мітынгаў яшчэ не развязаны. Задаволілі толькі адну – на правядзенне мітынгу «берасцейкі супраць свінцу». Адмоўлена ў 80 масавых мерапрыемствах.