Мацвей Елісееў: Думаю, пражыванне ў Раўбічах стала для замежнікаў невялікім шокам
3- 24.02.2019, 14:33
- 21,590
Харчаванне і побытавыя ўмовы ў Беларусі адрозніваюцца ад звыклых на еўрапейскіх этапах Кубка свету.
Срэбны прызёр чэмпіянату Еўропы ў пераследзе Мацвей Елісееў падзяліўся меркаваннем пра біятлонны цэнтр «Раўбічы», піша tut.by.
– Са спартовага пункту гледжання «Раўбічы» выдатныя. Тут ёсць вялікае стрэльбішча, цір, выдатны выбар трасаў. А вось пражыванне трохі саступае. Пакоі маленькія і старамодныя. Хацелася б больш прасторы ў нумарах, дзе можна было б раскласці рэчы. Для мяне гэта не з'яўляецца праблемай – я чалавек паходны. А для замежнікаў, думаю, гэта стала невялікім шокам. Хоць, зноў жа: гледзячы з чым параўноўваць. У тым самым Оберхофе ўмовы відавочна горшыя. Там ёсць вялікі гатэль, але нумары неверагодна вузкія.
Елісееў таксама апавёў, чым харчаванне ў Беларусі адрозніваецца ад звыклага на еўрапейскіх этапах Кубка свету.
– Ежа ў сталоўцы трохі тлустая і неспартовая. Мне дык класна – я ўжо адвык ад расейскай ежы, а тут падаюць супы са смятанай і маянэзныя салаткі. Гэта смачна, але крыху не тое, што трэба спартоўцам.
Мацвей падкрэсліў, што адчуваў сябе ў Раўбічах як дома.
– Падтрымка была неймаверная. Мы тут не ў іншай краіне, а дома. Пасля фінішу гледачы проста разрывалі.