Трамп мерыцца правесці ў Дзень незалежнасці імпрэзу «Салют Амерыцы»
4- 24.02.2019, 19:43
- 9,064
Прэзідэнт ЗША заявіў, што правядзе адную з найбуйнейшых імпрэз у гісторыі Вашынгтона
Прэзідэнт ЗША Дональд Трамп заявіў, што плануе правесці мерапрыемства «Салют Амерыцы» ў Вашынгтоне 4 ліпеня, у Дзень незалежнасці ЗША, замест планаванага вайсковага парада, які быў скасаваны летась, паведамляе «Голас Амерыкі».
«Не прапусціце! Мы правядзём адное з найбуйнейшых мерапрыемстваў у гісторыі Вашынгтона 4 ліпеня», - напісаў Трамп у Твітэры ў нядзелю.
HOLD THE DATE! We will be having one of the biggest gatherings in the history of Washington, D.C., on July 4th. It will be called “A Salute To America” and will be held at the Lincoln Memorial. Major fireworks display, entertainment and an address by your favorite President, me!
— Donald J. Trump (@realDonaldTrump) 24 февраля 2019 г.
У гэты дзень на Нацыянальнай алеі ў сталіцы ЗША традыцыйна збіраюцца некалькі сотняў тысяч чалавек, каб паглядзець канцэрт ля Капітолія і святочны феерверк.
Аднак Трамп заявіў, што яго імпрэза пройдзе ў процілеглым канцы алеі, ля мемарыяла Лінкальна, і будзе ўключаць, акрамя феерверкаў і забаўляльнай праграмы, «Зварот вашага ўлюбёнага прэзідэнта, гэта значыць мяне».
Трамп, якога натхнілі парады з нагоды Дня ўзяцця Бастыліі ў Францыі, летась заклікаў правесці вайсковы парад на Пенсільванія-авеню ў Вашынгтоне ў Дзень ветэранаў 11 лістапада, які ў мінулым годзе супаў са 100-годдзем заканчэння Першай сусветнай вайны.
Падрыхтоўка да параду была скасаваная, калі ў міністэрстве абароны ацанілі выдаткі на дастаўку вайскоўцаў і вайсковай тэхнікі ў Вашынгтон на 92 мільёны даляраў.
Прадстаўнікі мясцовых уладаў Вашынгтона таксама выказалі трывогу ў сувязі з тым, што гусеніцы вайсковых танкаў пашкодзяць гарадскія вуліцы ўздоўж маршруту параду і побач з ім.
Раней у гэтым месяцы Трамп заявіў журналістам, што зноў разглядае ідэю параду, але неўзабаве паправіўся і назваў мерапрыемства сходам. Ніякіх згадак пра ўдзел вайскоўцаў у імпрэзе 4 ліпеня ў нядзелю не было.