Віцэ-прэм'ер Ляшэнка: Справядлівасці ў пытаннях працы нашых прадпрыемстваў на рынку ЕАЭС няма

Намеснік прэм'ер-міністра Беларусі паскардзіўся на рынак Еўразійскай саюза.

Большасць паказчыкаў сацыяльна-эканамічнага развіцця за 2018 год міністэрства прамысловасці выканала (аб'ёмы вытворчасці, напрыклад, або ўзровень рэнтабельнасці), але задаволенасці ўсё адно няма, паведаміў у эфіры СТВ намеснік прэм'ер-міністра Беларусі Ігар Ляшэнка, піша tut.by.

«Не магу сказаць, што мы задаволеныя вынікамі, бо выкананне паказчыкаў шмат у чым абумоўлена паспяховай працай буйных прадпрыемстваў».

Таксама незадаволенасць віцэ-прэм'ера выклікаюць няроўныя, паводле ягоных слоў, падыходы да дзейнасці нашых прадпрыемстваў на рынку Еўразійскага саюзу. На ягоную думку, узаемадзеянне ў розных сферах магло б быць больш эфектыўным у выпадку забеспячэння роўных умоў гаспадарання. Пакуль жа вытворцы ў Расеі сур'ёзна субсідуюцца дзяржавай. «Дамоўленасці сёння відазмяняюцца, вытворцы ў Расейскай Федэрацыі маюць падтрымку - субсідаванне да 25%», - сказаў ён. Беларускія ж прадпрыемствы могуць на яе разлічваць толькі пры значнай ступені лакалізацыі. «Пакуль справядлівасці ў гэтым пытанні няма», - канстатаваў Ляшэнка.

Закранулі і тэму рэфармавання Мінпраму. Нагадаем, такая прапанова прагучала ў канцы мінулага года на пашыраным пасяджэнні Пастаяннай камісіі дзяржаўнага будаўніцтва, мясцовым самакіраванні і рэгламенце «палаты прадстаўнікоў» падчас прадстаўлення праграмы дзейнасці ўрада на 2018-2020 гады. Першы варыянт рэфармавання прадугледжвае стварэнне Міністэрства прамысловай палітыкі, якое будзе вызначаць кірункі развіцця прамысловага комплексу агулам, а не толькі машынабудаўнічых прадпрыемстваў. Пры гэтым мяркуецца падзел функцый рэгулятара і ўласніка. Другі варыянт прадугледжвае «стварэнне на базе Мінпрама дзяржкарпарацыі, і тут актыўна вывучаецца кітайскі досвед».

- Асабіста маё бачанне гэтага года ў тым, што Міністэрству прамысловасці трэба распрацаваць дэталёвую палітыку доўгатэрміновага і сярэднетэрміновага развіцця сваіх прадпрыемстваў, забяспечыць ім пошук інвестараў і аптымізацыю вытворчых працэсаў з фінансавым аздараўленнем. Ужо пасля развязання гэтай задачы можна думаць над пашырэннем Мінпрама як больш буйной арганізацыі - Міністэрства прамысловай палітыкі. Я за натуральнае ўдасканаленне пасля дасягнення добрых паказчыкаў, - заявіў сёння Ігар Ляшэнка.