Бунт кіроўцаў тралейбусаў: «Мінсктранс» пайшоў на саступкі

Як скарга кіроўцаў выклікала хвалю салідарнасці.

Кіроўцы Менскага тралейбуснага парку калектыўна паскардзіліся на ўмовы працы. «Мінсктранс», да якога належыць грамадскі транспарт сталіцы, адказаў tut.by, што думае аб звароце кіроўцаў.

Як скарга кіроўцаў з аднаго парку разраслася да петыцыі

Калектыўная скарга кіроўцаў тралейбуснага парку №3 на ўмовы працы сышла ў Міністэрства працы і сацыяльнай абароны, а яшчэ — у пракуратуру Маскоўскага раёна сталіцы.

Пад лістом, у якім кіроўцы апісвалі свае праблемы, падпісалася больш за 60 чалавек.

Распавялі кіроўцы аб сваёй незадаволенасці і ў СМІ. Скардзіліся на многае: праблемы з тармазамі, лысую гуму, дрэнную працу фараў, дворнікі. З іх слоў, сядзенні кіроўцаў падпёртыя цаглінамі, даводзіцца працаваць з мінімальнымі перапынкамі, часам без элементарнай магчымасці схадзіць у прыбіральню. Кіроўцы тралейбусаў незадаволеныя і тым, што ў іх ліквідавалі прэміі — напрыклад, за працу ў гадзіну розруху.

Да кіроўцаў тралейбуснага парка №3 пазней далучыліся і работнікі іншых паркаў, прычым не толькі тралейбусных. З'явілася петыцыя, у якой асвятлілі праблему шырэй: да абурэння падключыліся і кіроўцы іншых філіялаў «Мінсктранса», у тым ліку аўтобусных паркаў. Гэтая петыцыя набрала 1330 подпісаў. Да яе былі прымацаваныя шматлікія фатаграфіі з прыкладамі дрэннага тэхнічнага стану машын, на якіх возяць пасажыраў.

20 лютага ў тралейбусным парку №3 правялі сход з кіроўцамі.

— Былі не толькі кіроўцы з нашага тралейбуснага парка, аператыўна пад'ехалі калегі і з іншых, — распавёў адзін з работнікаў. — Зала быў перапоўненая, сесці не было дзе. На сустрэчу прыязджаў гендырэктар «Мінсктрансу» Лявонцій Папянок. У яго былі прэтэнзіі да кіраўніцтва тралейбуснага парку. Абмяркоўвалася, чаму ў такім стане знаходзіцца тэхніка, чаму ў тралейбусаў лысая гума, калі на складзе прадпрыемства ёсць запасная.

Са слоў кіроўцаў, пасля іх звароту ў тралейбусных парках праходзяць праверкі.

- Пачалі закупляць запчасткі, прывезлі машыну колаў. На сядзенні сталі ўсталёўваць новыя пнеўмападушкі.

Што адказвае на зварот кіроўцаў тралейбуснага парку №3 «Мінсктранс»?

«Мінсктранс» на запыт рэдакцыі што да сітуацыі з тралейбусным паркам №3 адказвае, што зварот кіроўцаў прааналізавалі, а аб тэхнічным стане тралейбусаў парку правялі «суцэльную праверку».

Кіраўніцтва тралейбуснага парку №3 паставілі задачу да 1 сакавіка «ліквідаваць недахопы ў тэхнічнай эксплуатацыі рухомага складу, яе выкананне ўзятае на асаблівы кантроль».

Сярэдні ўзрост тралейбусаў у парку №3 - 8,7 года. З красавіка 2017 года да студзеня 2019 года ў тралейбусным парку №3 правялі аднаўленчы рамонт 141 тралейбуса (66,5% ад усіх), адзначае прадпрыемства.

«Мінсктранс» паведамляе, што кіроўцам тралейбусаў, якія працуюць на тэхніцы з прабегам звыш 300 тысяч кіламетраў, даплачваюць. У студзені 2019 года даплата на аднаго кіроўцу, які працуе на тралейбусе з прабегам з пачатку эксплуатацыі ад 300 да 400 тысяч кіламетраў, склала 14,8 рубля, ад 400 да 500 тысяч кіламетраў - 39,7 рубля, ад 500 да 600 тысяч кіламетраў — 79,2 рубля, звыш 600 тысяч кіламетраў - 118,5 рубля.

Вібрацыю, шум і мікраклімат у тралейбусах вымяраў Менскі гарадскі цэнтр гігіены і эпідэміялогіі. «Згодна з іх высновамі, параметры мікраклімату на працоўных месцах кіроўцаў тралейбусаў знаходзяцца ў межах дапушчальных велічынь», - піша «Мінсктранс».

З тым, што заробак кіроўцаў падае, тут не згодныя. Наадварот, кажуць, - расце. Сярэднямесячны заробак кіроўцаў тралейбусаў парку №3 за лістапад 2018 года склаў 1 408,1 рубля, а за снежань 2018 года - 1 601,1 рубля, за студзень 2019 года - 1 688,9 рубля, паведамляе прадпрыемства.

Атэстацыя працоўных месцаў што да ўмоваў працы ў «Мінсктрансе» праводзіцца ў адпаведнасці з патрабаваннямі, а пенсіі работнікаў не залежаць ад яе вынікаў, удакладняюць у лісце, падрабязна пералічваючы палажэнні і інструкцыі, якімі кіруюцца.

«Прадпрыемствам ужытыя захады для захавання працягласці адпачынку ў сувязі са зніжэннем класа ўмоў працы. Парушэнняў заканадаўства пры змене ўмоў аплаты працы і правядзенні атэстацыі працоўных месцаў не ўстаноўлена», — падсумоўвае «Мінсктранс».

У адпаведнасці з калектыўнай дамовай кіроўцам устаноўлены сумарны ўлік працоўнага часу на месяц.

Рэжым працы кіроўцаў, а таксама выхадныя і працоўныя дні вызначаюцца графікамі працы, іх выхадныя могуць устанаўлівацца ў розныя дні тыдня. Пры гэтым дзён адпачынку кожны тыдзень павінна быць не менш, чым поўных працоўных тыдняў таго ж месяца. Паводле калектыўнай дамовы ў кіроўцаў павінна быць не менш за восем выходных.

«Колькасць рабочых і выхадных дзён у графіцы кіроўцаў плануецца з улікам патрэбы ў транспартным абслугоўванні насельніцтва і заканадаўства Рэспублікі Беларусь. У адпаведнасці з артыкулам 138 Працоўнага кодэкса Рэспублікі Беларусь пры зменнай працы, а таксама сумаванні ўліку працоўнага часу мінімальная працягласць штотыднёвага адпачынку можа вылічацца агулам за ўліковы перыяд», - піша «Мінсктранс».

У Міністэрстве працы і сацыяльнай абароны распавялі, што зварот кіроўцаў тралейбуснага парка №3 прадаўжаюць вывучаць.

Пракуратура Маскоўскага раёна Менска адказала кіроўцам, што тэрмін разгляду іх звароту працягнулі «ў сувязі з узніклай неабходнасцю ў атрыманні дадатковай інфармацыі».