Беларусь нанесла паразу Расеі ў фінале Сусветнай лігі сёгі

Беларусы выйгралі найбуйнейшы ў свеце анлайн-турнір у культавай японскай гульні.

У штогадовым турніры Сусветнай лігі сёгі ўдзельнічалі 40 каманд з 32 краін свету, у тым ліку з Японіі, ЗША, Францыі, Вялікабрытаніі, Нямеччыне, Аўстраліі. Але наймацнейшай стала каманда Беларусі.

У склад якой увайшлі навучэнец менскага ліцэя №1 Антон Старыкевіч (капітан), магістрант БДУ Пётр Шчаслёнак і навучэнец менскай гімназіі №7 Іван Марцаў. Беларуская каманда здабыла перамогу ва ўсіх матчах, уключаючы фінальны, у якім падолела каманду Расеі - 2:0.

Kp.by распытаў пераможцаў не толькі пра гульні, але і пра прызы.

- Узнагароджанне яшчэ наперадзе. Мы верым, што гэта як мінімум кругасветнае падарожжа або паездка ў Японію - наша каманда з задавальненнем адразу б з прадстаўнікамі японскай асацыяцыі сёгі, - усміхаючыся, распавёў капітан каманды Антон Старыкевіч. - А калі сур'ёзна, то мы вельмі рады, што змаглі паказаць годны вынік і набіць руку, па-за залежнасці ад таго, чым нас узнагародзяць. Ужо вядома, што узнагародай будуць анлайн-партыі з прафесійнымі гульцамі сёгі з Японіі. Але ў душы я спадзяюся, што і гэта яшчэ не ўсё (усміхаецца)...

Сёгі ў перакладзе з японскай мовы азначае «гульня генералаў». У Краіне ўзыходзячага сонца яна лічыцца самай папулярнай настольнай гульнёй і мае культавы статус.

За вонкавае падабенства сёгі празвалі японскімі шахматамі. Гульнявое поле - дошка памерам 9 на 9 клетак.

У кожнага гульца ў пачатку партыі па 20 фігур. Збітая фігура пераходзіць у рэзерв спаборніка і можа быць у любы момант вернутая на любое пустое поле дошкі (за некаторымі выключэннямі), што радыкальна павялічвае колькасць магчымых камбінацый.

Беларуская школа сёгі на сённяшні дзень адна з наймацнейшых у свеце. Яе цэнтрамі ў Менску з'яўляюцца клуб «Гінкаммуры» і секцыя пры сталічным Палацы моладзі.