Пад Пецярбургам у вайсковай частцы з комплексамі С-300 выбухнула бомба

Выбуховае прыстасаванне падкінулі да КПП.

У перыметры вайсковай частцы ў вёсцы Ваганавай у Ленінградскай вобласці выбухнула самаробнае выбуховае прыстасаванне. Пра гэта паведамляе 47News са спасылкай на крыніцу ў праваахоўных органах РФ, паведамляе РБК.

Інфармацыю пра выбух, таксама са спасылкай на крыніцу, пацвярджае «Фонтанка». Паводле звестак выданняў, інцыдэнт адбыўся напярэдадні, 8 сакавіка. Вядома пра яго стала толькі цяпер. Выбуховую прыладу падчас абходу перыметра выявіў паставы. Яна была вырабленая з корпуса ручнога ліхтара і начыненая гайкамі. Сілкаванне прылады забяспечвалася батарэйкай «Крона». Яна ляжала за некалькі дзясяткаў метраў ад КПП.

Салдат адкінуў прыладу ў бок. Прыкладна праз 30 секунд раздаўся выбух. Пры інцыдэнце ніхто не пацярпеў. Рэшткі выбуховага прыстасавання вывучылі выбухатэхнікі ФСБ.

РБК накіраваў запыт у прэс-службу УФСБ Расеі па Санкт-Пецярбургу і Ленінградскай вобласці.

Праваахоўныя органы распачалі крымінальную справу паводле арт. 223.1 КК РФ (незаконны выраб выбуховых рэчываў).

У вёсцы Ваганавай размешчанае вайсковая часць 28036, дзе дыслакаваўся 1489-ы гвардзейскі зенітна ракетны полк. На ўзбраенні палка знаходзяцца зенітныя комплексы С-300П.