У якой краіне ЕЗ больш за ўсё жанчын у парламенце і ўрадзе

Па гэтым паказчыку Еўразвяз апярэджвае астатні свет.

Гішпанія і Швэцыя падзялілі першае месца ў долі жанчын, якія займаюць ключавыя пазіцыі ў нацыянальным урадзе. У абедзвюх краінах 52% месцаў міністраў, дзяржсакратароў і іншых чыноўнікаў высокага класа займаюць жанчыны, піша "Европульс".

Як паведамляе еўрапейскае статыстычнае агенцтва Еўрастат, следам ідуць Францыя (49%) і Нідэрланды (42%).

Швэцыя стала лідарам сярод краін ЕЗ і ў долі жанчын-парламентарыяў - 47% дэпутатаў Рыксдага, аднапалатнага парламента Швэцыі. Следам ідзе Фінляндыя (там 42% парламентарыяў - жанчыны), Гішпанія і Бельгія (там іх па 40%).

Агулам у ЕЗ 30% месцаў у нацыянальных урадах і парламентах займаюць жанчыны. А 15 гадоў таму ў парламентах толькі 21% месцаў займалі жанчыны, ва ўрадах - 23%.

Ва ўдзельнай вазе жанчын у органах дзяржаўнай улады Еўразвяз сур'ёзна апярэджвае астатні свет. Згодна з дакладам The Global Gender Gap Report, прадстаўленым Сусветным эканамічным форумам у 2018 годзе, агулам у свеце толькі 18% месцаў у выканаўчай уладзе і 24% месцаў у парламентах займаюць жанчыны.