19 лiпеня 2019, Пятніца, 16:21
Мы ў адной лодцы
Рубрыкі

Каб спыніць Пуціна, трэба спыніць дыктатарскі рэжым у Беларусі

11
Андрэй Саннікаў

Беларусы сваёй барацьбой ратуюць Еўропу.

У бібліятэцы імя Вацлава Гаўла ў сталіцы Чэхіі былы кандыдат у прэзідэнты Беларусі Андрэй Саннікаў прэзентаваў чэшскі пераклад сваёй кнігі «Беларуская амерыканка ці выбары пры дыктатуры» (у чэшскім варыянце - «Мая гісторыя»). Ён напісаў яе пасля эміграцыі з Беларусі ў 2012 годзе.

На сустрэчу былы кандыдат у прэзідэнты прыйшоў разам з жонкай Ірынай Халіп і сынам Даніілам. У прэзентацыі ўзялі ўдзел больш за паўсотні чалавек, сярод якіх былі чэшскі пісьменнік Яхім Топал і былы паплечнік Гаўла, драматург Рэнэ Левінскі.

УРАЦІСЛАЎ БРАБЕНЕЦ І ІРЫНА ХАЛІП

Адкрываў імпрэзу былы дысідэнт, падпісант «Хартыі-77» і музыка легендарнага чэшскага гурта «Plastic People of the Universe» Ураціслаў Брабенец. У пачатку і ў канцы прэзентацыі ён выканаў сола імправізацыю на саксафоне.

«Радыё Свабода» сабрала некаторыя цытаты Андрэя Саннікава з выступу ў Празе.

«Я падтрымліваю Статкевіча»

«Мікалая Статкевіча вылучыў кандыдатам у прэзідэнты Беларускі Нацыянальны Кангрэс, куды ўваходзіць і «Еўрапейская Беларусь». Я падтрымліваю кандыдатуру Статкевіча. Ёсць пэўны момант з яго судзімасцю, але Статкевіч кажа, што ў Канстытуцыі няма ніякіх перашкод, а абмежаванне - гэта не закон, а дыктатарскае правіла.

Таму мы будзем патрабаваць рэабілітацыі палітвязняў, якую рэжым Лукашэнкі абяцаў Еўропе, каб тая зняла санкцыі. ЕЗ не выканаў сваіх абавязанняў і скасаваў санкцыі без выканання тых умоў, якія ён выстаўляў рэжыму. Таму гэта будзе і кампанія за рэабілітацыю ўсіх палітвязняў».

«У 2010 годзе мы перамаглі»

«У 2010 годзе мы перамаглі. Але тады не ставала разумення ў нашых дэмакратычных партнёраў, якія бачылі толькі Лукашэнку. Спрацавала лукашэнкаўская прапаганда - у выніку яны казалі, што ён пераможа. Але Лукашэнка не перамог.

Назіральнікі, як міжнародныя, так і нашы, былі запалоханыя. Я дагэтуль сутыкаюся са сведчаннямі таго, што Лукашэнка не перамагаў. Перамагала апазіцыя. А гэта знак таго, што павінен быў быць другі тур. А што адбываецца, калі ў дыктатарскіх рэжымах праходзіць другі тур - мы ведаем. Гэта нават не перамога, а знішчэнне дыктатуры. І толькі ў мяне такіх сведчанняў блізу 50, з пратаколамі і паказаннямі сведак.

«Ва ўладзе былі гатовыя размаўляць аб сумленных выбарах»

«Мы тады не ставілі умоў, што Лукашэнка павінен імгненна сысці. Мы былі гатовыя пачынаць перамовы аб сумленных парламенцкіх выбарах, каб былі адкрытыя пэўныя каналы, каб пачало адбывацца выратаванне краіны. Я ўпэўнены, што апазіцыя на іх бы перамагла. Дыктатары разумеюць, што апазіцыя лепш падрыхтаваная да сумленных выбараў».

«Някляева проста паляпаў па плячы»

«Захад у 2010 годзе не падтрымліваў дэмакратычныя сілы. Прыязджалі Сікорскі і Вестэрвеле, прапаноўвалі грошы Лукашэнку. Якая гэта падтрымка апазіцыі? Някляева Сікорскі проста паляпаў па плячы і сказаў, што ты, маўляў, малайчына, але мы будзем працаваць з Лукашэнкам».

«Захад не падтрымлівае апазіцыю і сёння»

«Дыктатарскі рэжым Лукашэнкі - гэта небяспека для ўсяго рэгіёну, для Еўропы. Каб спыніць Пуціна, трэба спыніць дыктатарскі рэжым у Беларусі. Памылка Захаду ў тым, што яны не звярталі ўвагу на Лукашэнку, які стварыў лабараторыю рэжымаў, у тым ліку і для Пуціна».

Справа за людзьмі, якія выходзілі на пратэсты «недармаедаў»

«Апазіцыя амаль знішчаная. Распаўсюджваецца шмат хлусні. Але я не хачу нікога вінаваціць. Гэта доўжыцца 25 гадоў, а правілы дыктатуры: кожны цэнтр павінен быць інфільтраваны. Цяпер справа не за лідарамі, а за грамадствам. За тымі людзьмі, якія выходзілі падчас пратэстаў «дармаедаў». За тымі, хто сапраўды так не можа жыць, хто перажывае за дзяцей. Яшчэ ніколі так востра не стаяла пытанне, што дэмакратыя і незалежнасць - гэта адно і тое ж. Гэты рэжым ніколі не ўратуе незалежнасць Беларусі».

«Гэта мы ратуем Еўропу»

«Паглядзіце, што адбываецца сёння ў Еўропе. Гэта мы яе сёння ратуем. Тое, што людзі выходзяць і змагаюцца за каштоўнасці, гэта барацьба за еўрапейскія каштоўнасці. А што адбываецца ў гэты час у Еўропе? Усё больш палітыкаў заклікаюць сябраваць з Пуціным. Захад не вытрымлівае прынцыповую пазіцыю, а мы вытрымліваем. Шмат што залежыць ад Украіны. А Захад яе не падтрымлівае. Гэта ўсё выклік іх бяспецы. Здаецца, калі тлумачыш гэта асабіста еўрапейскім палітыкам, яны згаджаюцца. А робяць потым зусім іншае».

«Масква не дасць Лукашэнку грошай»

«У Лукашэнкі не будзе лёгкага жыцця. Масква не дасць яму грошай на перавыбранне. Масква скарыстаецца гэтым, каб націснуць яшчэ мацней і атрымаць маёмасць у Беларусі. Захад даваць грошы не гатовы. Ёсць там карысныя ідыёты, якія над гэтым працуюць, але пакуль, на шчасце, гэтых грошай няма».