У Кіеве каля расейскай амбасады адкрылі сквер імя Барыса Нямцова
5- 15.03.2019, 15:37
- 9,865
Пастанову ўвекавечыць памяць расейскага палітыка прыняла Кіеўская гарадская рада.
У Кіеве ў пятніцу, 15 сакавіка, афіцыйна адкрылі сквер імя расейскага палітыка Барыса Нямцова. На цырымонію прыйшлі старшыня Фонду Барыса Нямцова Уладзімір Кара-Мурза-малодшы, дачка Барыса Нямцова Жанна, мэр Кіева Віталь Клічко, а таксама ўкраінскія дэпутаты - сябры палітыка, паведамляе карэспандэнт «Нямецкай хвалі».
Аднойчы «пасольства РФ будзе ганарыцца» тым, што менавіта побач з ім знаходзіцца сквер імя Нямцова, заявіў Клічко. Гарадская рада ўкраінскай сталіцы прыняла пастанову назваць сквер каля расейскага дыппрадстаўніцтва ў Кіеве імем забітага палітыка ў лістападзе 2018 года.
Заказчыкі злачынства не знойдзеныя
Барыс Нямцоў быў забіты 27 лютага 2015 года на Вялікім Маскварэцкім мосце ў Маскве. Выканаўцы злачынства былі прысуджаныя судом да працяглых тэрмінаў турэмнага зняволення, аднак заказчыкі забойства не знойдзеныя дагэтуль.
Імем расейскага палітыка таксама названыя плошчу ў Вашынгтоне і сквер у Вільні. Паводле інфармацыі карэспандэнта, сабраныя ўсе неабходныя дакументы для адкрыцця сквера ў канадскім Таронта.
Акрамя таго, аналагічныя ініцыятывы запушчаныя ў Лондане і Варшаве. Мемарыяльныя дошкі ў памяць пра Барыса Нямцова ўсталяваныя на дамах у Маскве, Ніжнім Ноўгарадзе і Яраслаўлі.