Школьнікі зладзілі сусветны страйк супраць зменаў клімату
2- 15.03.2019, 16:32
- 8,352
Акцыі падтрымалі школьнікі з больш чым 100 краін свету.
Ва ўсім свеце праходзяць страйкі школьнікаў, якія патрабуюць больш рашучых дзеянняў для прадухілення змяненняў клімату. Пра акцыі паведамляе ў Твітэры іх арганізатарка, швэдская школьніца Грэта Тунберг. Мітынгі намечаныя ў тым ліку ў Францыі, Вялікай Брытаніі, ЗША, Бангладэш, Іране, Індыі і Аўстраліі, паведамляе «Радыё Свабода».
Паведамляецца, што акцыі падтрымалі школьнікі з больш чым 100 краін свету. У адных выпадках гаворка ідзе пра дзясяткі, у іншых - пра тысячы навучэнцаў. Многія з іх у гэты дзень прапускаюць урокі.
Way, way over 10000 students out in rain in Stockholm today. School striking for the climate! #FridayForFuture #SchoolsStrike4Climate pic.twitter.com/XB5vwU96gu
— Greta Thunberg (@GretaThunberg) 15 марта 2019 г.
Паводле звестак Euronews, пратэстоўцы заблакавалі ўваход у штаб-кватэру найбуйнейшага французскага банка Société Générale, палічыўшы дзеянні фінансавай установы шкоднымі. На сайце арганізатараў пратэсту гаворыцца, што ў Расеі павінны прайсці чатыры акцыі: у Маскве, Новасібірску, Кіраве і Яраслаўлі. Мітынг у Кіраве ўзгоднены з уладамі, паведамляецца на старонцы «Вконтакте» «Экапратэст Кіраў|FridaysForFuture». Пры гэтым таксама вядома пра серыю адзіночных пікетаў школьнікаў у Іжэўску.
Прычына пратэстаў: недастатковыя, на думку ўдзельнікаў, дзеянні дзяржаў супраць зменаў клімату. «Навошта вучыцца, калі будучыня можа не наступіць?», - рэзюмуюць дзеці-актывісты.
У 2015 годзе большасць краін свету на канферэнцыі ААН у Парыжы пагадзіліся паспрабаваць хаця б часткова спыніць глабальнае пацяпленне. Для гэтага, напрыклад, прапануецца знізіць выкід парніковых газаў. Пасля прыходу да ўлады Дональда Трампа ў 2016 годзе ЗША выйшлі з Парыжскага пагаднення.
