Жыхар Полацка - «дармаедскай» камісіі: Мы выставім вам пазоў за генацыд беларускага народа

Каб знайсці «дармаедаў», чыноўнікі тэлефануюць іх знаёмым.

14 сакавіка жыхару Полацка Аляксею патэлефанавалі з незнаёмага нумара. Суразмоўца прадставіўся старшынём аднаго з сельсаветаў Віцебшчыны і пацікавіўся, дзе жыве і чым займаецца дзяўчына Аляксея. Але размова не склалася, паведамляе Еўрарадыё:

- Дзе яна і чым займаецца? - пытаецца чыноўнік.

- З якой мэтай вас гэта цікавіць?

- Ёсць спісы тых, хто не працуе...

- Я з нагоды гэтых спісаў вам адкажу! - выходзіць з сябе Аляксей. - Прыбірайце з гэтага спісу, і пажадана кампенсацыю нам даслаць тысяч на пяць рублёў. Супраць Рэспублікі Беларусь мы выставім пазоў за ўшчамленне ў правах і за генацыд насельніцтва Беларусі! Пытанні ёсць яшчэ? Вы мяне пачулі? Гэта ваша праца, і вы шукайце!

Аляксей уважае, што інфармацыю пра яго знаёмую збіраў адзін з сябраў камісіі, якая каардынуе працу садзейнічання занятасці насельніцтва. Камісіі шукаюць людзей, не занятых у эканоміцы. Пры гэтым, са слоў палачаніна, дзяўчына, пра якую ішла гаворка, афіцыйна працуе.

«Патэлефанаваў сябра нейкай камісіі, - распавядае Еўрарадыё Аляксей. — Тэлефануе, сведчыць, што гэта я, і пытаецца пра маю знаёмую, працуе яна ці не. Па-першае, адкуль мой нумар у гэтага чалавека? Па-другое, навошта наогул збор гэтай інфармацыі? У краіне тэрмін «асабістая інфармацыя» размыты цалкам!»

Наколькі законна тое, што чыноўнікі збіраюць інфармацыю пра людзей праз іх знаёмых? Хто правярае гэтыя звесткі, і што будзе, калі пра чалавека нагавораць глупства? У каментарах пад гнеўным допісам Аляксея людзі пішуць пра 1937 год, калі ўсе даносілі на ўсіх. Еўрарадыё спрабуе разабрацца ў сітуацыі.

Распытвае, але штосьці расказваць не хоча

Журналісты патэлефанавалі па нумары, з якога тэлефанавалі Аляксею. Мужчына, які здымае слухаўку, аказваецца катэгарычна супраць таго, каб штосьці распавядаць пра сябе праз тэлефон.

«Я людзям калі тэлефаную, прадстаўляюся, - адказвае на нашы пытанні чыноўнік. - Чаму вы ўважаеце, што я павінен вам нешта казаць? Прыязджайце, бярыце паперу, хто вас накіраваў, і пагаворым. Па тэлефоне вы мяне праслухоўваеце, запісваеце! Навошта мне гэта? Я нармальна працую, згодна з законам Прэзідэнта Рэспублікі Беларусь. Ёсць дэкрэт №3, згодна з якім, некаторых мы абзвоньвалі, ці занятыя яны ў эканоміцы. Задаю пытанні, дзе хто працуе і чым займаецца».

З гэтымі словамі чыноўнік кідае слухаўку.

Праваабаронца: «гэта відавочнае перавышэнне паўнамоцтваў»

Праваабаронца Андрэй Стрыжак распавёў, што з боку чыноўнікаў незаконна патрабаваць адказаў на такія пытанні. Чалавек мае права адмовіцца адказваць.

«Любы чалавек на такі званок можа адказаць як заўгодна, - тлумачыць Андрэй Стрыжак. - Можна нават наогул не адказваць. Мы не бачым суразмоўцу, таму можна сказаць: «Вася, хопіць жартаваць!», і пакласці слухаўку. Калі вы не хочаце даваць нейкія звесткі, то праз тэлефон вы можаце гэтага не рабіць. Іншая справа, калі чалавека выклікаюць у адпаведныя органы позвай. Гэта іншыя абавязанні».

Праваабаронца дадае, што такія дзеянні чыноўнікаў-відавочнае перавышэнне паўнамоцтваў.