Канада ўвяла новыя санкцыі супраць Расеі

Краіна зрабіла гэта услед за ЗША і ЕЗ.

Канада ўвяла санкцыі супраць 114 фізічных і 15 юрыдычных асоб за захоп украінскіх караблёў і вайскоўцаў у Чорным моры. Пра гэта паведамляе «Зеркало недели» са спасылкай на прэс-службу ўрада Канады.

«У каардынацыі з ЕЗ і ЗША Канада сёння аб'яўляе пра новыя санкцыі ў адказ на агрэсіўныя дзеянні Расеі ў Чорным моры і Керчанскім праліве і незаконную анэксію Расеяй Крыма», – гаворыцца ў паведамленні.

Санкцыі з'яўляюцца адказам на «вайсковыя дзеянні Расеі супраць трох украінскіх судоў і захоп украінскіх маракоў у Чорным моры ў лістападзе 2018 года».

«Сённяшнія захады, узгодненыя з ЕЗ і ЗША, падкрэсліваюць захаванне трансатлантычнага адзінства ў адказ на агрэсіўныя дзеянні Расеі ва Украіне і парушэнне Расеяй міжнароднага права», - падкрэслілі ва ўрадзе.

Імёны асобаў, супраць якіх уведзеныя санкцыі, не пазначаны.

З моманту анэксіі Расеяй Крыма ў 2014 годзе Канада ўвяла санкцыі супраць больш за 300 фізічных і юрыдычных асоб, многія з якіх былі ўзгодненыя з ЗША і ЕЗ. Сённяшнія санкцыі даводзяць гэта лік да 435. Санкцыі Канады замарожваюць актывы і забараняюць угоды.

ЗША ўвялі санкцыі супраць 6 расейцаў і 8 кампаній за атаку ў Керчанскай пратоцы. Еўразвяз таксама ўвёў эканамічныя захады супраць васьмі расейцаў.

Нагадаем, 25 лістапада мінулага года расейскія памежнікі атакавалі і захапілі два катэры і рэйдавы буксір Вайскова-Марскіх Сіл Узброеных Сіл Украіны, якія накіроўваліся з Адэсы ў Марыупаль. Раненні атрымалі некалькі маракоў, у палон трапілі 24 ўкраінскія вайскоўцы.

Усе 24 украінскія вайскоўцы, якіх незаконна ўтрымліваюць у СІЗА Масквы, запатрабавалі лічыць сябе ваеннапалоннымі і ставіцца да іх у адпаведнасці з нормамі Жэнеўскай канвенцыі.