Стралку з Новай Зеландыі выставілі абвінавачванне

Яго двое саўдзельнікаў затрыманыя.

Галоўны падазраваны паводле справы аб забойстве 49 чалавек у двух мячэцях у новазеландскім Крайстчэрчэ ў суботу быў дастаўлены ў акруговы суд, паведамляе «Голос Америки».

Брэнтан Тарант, 28-гадовы грамадзянін Аўстраліі, які называе сябе «белым нацыяналістам», з'явіўся ў акруговым судзе Крайстчэрча ў суправаджэнні двух узброеных паліцэйскіх. Суддзя выставіў Таранту абвінавачванне ў забойстве.

Пасля таго, як падазраванага вывелі з залы суда, суддзя сказаў, што Таранту неўзабаве выставіць яшчэ шэраг абвінавачванняў.

Двое меркаваных саўдзельнікаў аўстралійца таксама арыштаваныя. Паліцыя цяпер высвятляе, якую ролю яны маглі гуляць у арганізацыі нападаў.

Падчас прэс-канферэнцыі, якая адбылася ў суботу раніцай, прэм'ер-міністр Новай Зеландыі Джасінда Ардэрн сказала, што паліцыя спыніла дзеянні Таранта ў момант яго затрымання. «Ён меў намер працягнуць сваю атаку», - падкрэсліла Ардэрн.

Яна назвала масавую стральбу «нябачаным актам гвалту» і заявіла пра неабходнасць унясення змяненняў у мясцовае заканадаўства аб абароце агнястрэльнай зброі. Са слоў Ардэрн, у стралка было пры сабе пяць відаў зброі, у тым ліку, дзве паўаўтаматычныя вінтоўкі. Усю зброю Тарант набыў легальна.

Як дадаў прэм'ер-міністр, ні стралок, ні яго меркаваныя саўдзельнікі не лічыліся ў спісах патэнцыйных тэрарыстаў у Новай Зеландыі і Аўстраліі.

Прэм'ер-міністр Аўстраліі Скот Морысан назваў Таранта «экстрэмістам і ўльтраправым тэрарыстам».

Атакі былі праведзены падчас пятнічнай малітвы, калі ў мячэцях знаходзіліся сотні вернікаў. Паводле звестак уладаў, у мячэці Аль-Нур загінуў 41 чалавек. Яшчэ сем чалавек былі забітыя ў мячэці Лінвуд, размешчанай у 10 хвілінах язды ад Аль-Нур. 48 чалавек, у тым ліку некалькі дзяцей, атрымалі агнястрэльныя раненні.

Падчас правядзення нападаў стралок вёў жывую трансляцыю ў «Фэйсбуку». Ён таксама апублікаваў у сацсетках 74-старонкавы нацыяналістычны маніфест, у якім асудзіў мусульман і назваў імігрантаў «захопнікамі».

У маніфесце таксама гаворыцца, што Тарант наважыў правесці атаку ў Новай Зеландыі, каб паказаць, што ніводнае месца ў свеце нельга лічыць бяспечным.