Гарачая вада для баранавіцкіх «дармаедаў» падаражэла ў 10 разоў

Плата за падагрэў вады ў сакавіцкім рахунку «дармаеда» ў Баранавічах павялічылася з 5,8 да 58 рублёў.

Жыхарка Баранавічаў Ірына паведаміла, што плата за падагрэў вады ў сакавіцкім рахунку ў іх з мужам кватэры вырасла з 5,8 да 58 рублёў. Жанчына здзіўляецца, як атрымалася такая вялізная сума, бо, з яе падлікаў, гарачая вада для «дармаедаў» павінна была падаражэць не так моцна, піша intex-press.by.

Ірына разам з мужам і дзіцем жывуць у аднапакаёвай кватэры. Уласнікам жылля з'яўляецца яе муж, і ён - адзіны, хто прапісаны на гэтай жылплошчы, бо Ірына з дзіцем зарэгістраваныя па іншым адрасе.

Ірына працуе, а яе муж праз праблемы са здароўем афіцыйна не працаўладкаваны.

«Муж не сядзіць дома, не лайдачыць, але афіцыйна працу знайсці не можа, бо медкамісію не пройдзе. У прынцыпе, нам ёсць за што жыць, мы не ныем», - распавядае суразмоўца.

Са слоў Ірыны, у сярэдзіне сакавіка яны з мужам атрымалі рахунак і выніковая сума іх, мякка кажучы, здзівіла: «камуналка» за іх «аднапакаёўку» вырасла ў 2,5 разы.

«Плата за падагрэў вады павялічылася з 5,8 да 58 рублёў! Ды мы ведалі, што мужу, як непрацуючаму, гэтую паслугу ЖКГ будуць налічваць поўным коштам. Але ніхто не казаў, што гарачая вада падаражэе ў 10 разоў. Як такое магчыма? Адкуль такія лічбы?» - абураецца яна.

Ірына распавядае, што, на яе падлікі, гарачая вада павінна была падаражэць раз у пяць, бо цяпер, калі верыць звесткам камунальнікаў, субсідаваны тарыф складае 20% ад «поўнага». А ўлічваючы тое, што выдаткі гарачай вады ў іх сям'і 4-5 кубоў на месяц, муж і жонка вызначылі, што здужаюць аплаты.

«Мы не думалі, што гарачая вада падаражэе ў 10 разоў! - разважае Ірына. - Калі гэты тарыф, паводле якога нам налічылі плату за падагрэў вады, - стоадсоткавы, то раней, атрымліваецца, нам ваду наогул дарам грэлі?»