Пашынян назваў умову, пры якой АДКБ перастане існаваць

Прэм'ер Арменіі адказаў на магчымае прызначэнне беларуса Станіслава Зася.

Абмеркаванне пытання прызначэння новага генеральнага сакратара Арганізацыі Дамовы аб калектыўнай бяспецы прадаўжаецца, новы генеральны сакратар АДКБ не будзе прызначаны без згоды Ерэвана, і армянскі бок займае ў гэтым пытанні канструктыўную пазіцыю, заявіў прэм'ер-міністр Арменіі Нікол Пашынян, паведамляе «Інтэрфакс».

«Не можа быць [прызначэння] без удзелу і згоды Арменіі. Гэта будзе азначаць, што АДКБ не існуе», - сказаў Пашынян на прэс-канферэнцыі ў аўторак.

З ягоных слоў, пазіцыя Ерэвана ў пытанні прызначэння новага генеральнага сакратара АДКБ «вельмі канструктыўная».

- Мы мяркуем, што гэты тэрмін наш. Нашы партнёры не згодныя, кажуць, што гэтае пытанне не адрэгуляванае. Мы кажам, што тады да прызначэння новага генеральнага сакратара давайце ў статуце АДКБ удакладнім: калі з нейкіх прычын тэрмін застаецца незакончаным, то як павінна рэгулявацца пытанне? І, здаецца, мы прыйшлі да згоды ў гэтым пункце.

Вакансія генеральнага сакратара АДКБ утварылася пасля таго, як Арменія датэрмінова адклікала свайго прадстаўніка Юрыя Хачатурава, які адпрацаваў на гэтай пазіцыі толькі паўтара года з трох.

Арменія намагае, каб і наступныя паўтара года генеральным сакратаром АДКБ быў прадстаўнік яе краіны.

Менск прапанаваў на месца старшыні Станіслава Зася - дзяржсакратара Савета бяспекі. Ён атрымаў згоду ад астатніх кіраўнікоў дзяржаў, якія ўваходзяць у АДКБ, але толькі не ад Арменіі.