Расейскія ўлады пра бамбавікі ў Крыме: «Іх там няма»

Раней кіраўнік камітэта Савета Федэрацый у абароне заявіў, што РФ размясціла ў Крыме «Іскандэры» і ТУ-22М3.

Старшыня камітэта Дзярждумы Расеі ў абароне Уладзімір Шаманаў адмаўляе інфармацыю, якая з'явілася аб тым, што Расея размясціла ў анэксаваным Крыме звышгукавыя бамбавікі Ту-22М3, здольныя паражаць цэлі на выдаленні да 2 тысяч 200 кіламетраў ад аэрадромаў базавання, а таксама аператыўна-тактычныя ракетныя комплексы «Іскандэр-М», паведамляе svoboda.org.

«Іх цяпер там проста няма, - заявіў Шаманаў. - Інфармацыя, якая з'явілася раней у СМІ не адпавядае рэчаіснасці».

Раней пра размяшчэнне ТУ-22М3 паведаміла агенцтва «Интерфакс» са спасылкай на таго ж Шаманава, пры гэтым апублікаваўшы яго простую мову. Кіраўнік камітэта ў абароне, калі верыць нататцы, заяўляў, што ў Крыме размешчаныя «самалёты ракетаноснай авіяцыі, якія праходзяць глыбокую мадэрнізацыю і здольныя сваім узбраеннем знішчыць любую цэль у Еўропе».

Такую ж інфармацыю размясціла выданне «Лента.ру», прычым са спасылкай на федэральнае агенцтва «РИА Новости». А яшчэ раней, у панядзелак, аб разгортванні ў Крыме бамбавікоў Ту-22М3 паведаміў кіраўнік камітэта ў абароне і бяспецы Савета Федэрацыі Віктар Бондараў. Ён таксама заяўляў, што «далёкасць крылатых ракет на борце самалётаў дазваляе несці боезарад у любы пункт Еўропы, тым самым уражваючы любы аб'ект варожых сістэм СРА і СПА, а мадэрнізацыя на працягу некалькіх наступных гадоў зробіць іх універсальным сродкам для ўдараў па ўсіх тыпах цэляў на адлегласці ў тысячы кіламетраў».

У аўторак у прэс-службе камітэта Савета Федэрацыі ў абароне і бяспецы зняпраўдзілі і словы Бондарава. Там адзначылі, што інфармацыя пра наяўнасць на паўвостраве бамбавікоў Ту-22М3 і ракетных комплексаў «Іскандэр-М» «памылковая». «У Крыме разгорнутыя зенітна-ракетныя комплексы С-300 і С-400, «Бук-М2», «Панцыр-С1», а таксама сістэмы СРА і СПА, здольныя надзейна прыкрываць атакі з паветра», - заявілі ў прэс-службе Савет Федэрацыі.

14 сакавіка ў Міністэрстве абароны Расеі паведамлялі, што два расейскія далёкія бамбавікі Ту-22М3 выканалі палёт над нейтральнымі водамі Чорнага мора, у час якога «экіпажы пераадолелі блізу чатырох з паловай тысяч кіламетраў і знаходзіліся ў паветры больш за пяць гадзін».

У снежні 2018 года Генеральная асамблея ААН прыняла рэзалюцыю, у якой асудзіла мілітарызацыю Крыма, Чорнага і Азоўскага мораў, а таксама заклікала Расею вывесці з тэрыторыі паўвострава свае войскі.

18 сакавіка адзначалася пятая гадавіна анэксіі Крыма, якую ў Расеі афіцыйна называюць «уз'яднаннем».