Расстат спыняе публікацыю штомесячных звестак аб даходах расейцаў
14- 20.03.2019, 16:39
- 10,919
Методыку зменяць і пералічаць «прамінулай датай» увесь перыяд падзення даходаў.
Рэформа расейскай эканамічнай статыстыкі, анансаваная ў канцы мінулага года пасля значнага пагаршэння лічбаў аб узроўні жыцця насельніцтва, афіцыйна стартавала, піша finanz.ru.
Расстат з красавіка спыняе публікацыю штомесячных звестак аб рэальных даходах расейцаў, паведаміў у аўторак кіраўнік установы Павел Малкаў пасля паседжання навукова-метадалагічнай рады.
З гэтага часу паказчык, што ацэньвае суму, якая застаецца на руках у людзей пасля ўсіх абавязковых аплатаў і карэкціроўкі на інфляцыю, будзе публікавацца раз на квартал.
Методыку яго падліку зменяць і пералічаць звесткі за апошнія 6 гадоў - пачынаючы з 2013 года, паведаміў Малкаў.
Пад перагляд патрапіць самы балючы для эканомікі перыяд, цягам якога даходы насельніцтва падалі пяць гадоў запар, чаго не было нават напачатку 1990-х, а ў падрахунку ўпалі на 12%.
Пра «жахлівыя» якасці звестак Расстата, якія паказалі, што летась даходы зноў упалі (на 0,2%), насуперак прагнозам урада і ўстаноўцы прэзідэнта на рывок», у канцы снежня заявіў кіраўнік Мінфіна Антон Сілуянаў. Ён падкрэсліў, што да Расстата вялікія прэтэнзіі, а методыку падліку «трэба мяняць».
Тады ж Аляксандр Сурынаў, які ўзначальваў Расстат з 2009 года, падаў заяву аб сыходзе на ўласнае жаданне, якое неадкладна падпісаў прэм'ер Дзмітрый Мядзведзеў.
Рэформу статыстыкі аб даходах падтрымалі большасць экспэртаў, распавёў у аўторак Малкаў, экс-міністр эканамічнага развіцця Саратаўскай вобласці, які ўзначальвае Расстат з канца снежня.
Пры разліку даходаў многіх звестак проста няма, і робіцца па сутнасці прагноз, сказаў Малкаў. Новая ж методыка «больш якасная і вынікі будуць больш абгрунтаваныя», дадаў ён.
Намеснік кіраўніка Расстата Канстанцін Лайкам адзначыў, што «радыкальнай» змены ў дынаміцы рэальных даходаў новая метадалогія не прынясе.