Берасцеец знайшоў банкаўскую мапу і купіў па ёй віртуальны танк
21- 20.03.2019, 19:53
- 20,642
Яго будуць судзіць.
Жыхара Берасця абвінавачваюць у кіберзлачынстве - крадзяжы грашовых сродкаў з дапамогай кампутарнай сістэмы, інфармуюць у пракуратуры Берасця.
Пацярпелай у гэтай крымінальнай справе стала дзяўчына, якая згубіла ў абласным цэнтры сваю банкаўскую картку. «Пластык» знайшоў 29-гадовы мясцовы жыхар, але ён не стаў аддаваць уладальніцы або вяртаць у банк карту. А замест гэтага маладзён прысвоіў чужыя грошы.
Дома злачынец зайшоў у інтэрнэт са свайго кампутара і расплаціўся, увёўшы звесткі чужой карты, за віртуальны танк у папулярнай кампутарнай шматкарыстальніцкай анлайн-гульні.
Яго дзеянні кваліфікаваныя, як крадзеж сродкаў з банкаўскага рахунку пацярпелай. Распачатая крымінальная справа, матэрыялы якой ужо перададзеныя ў суд. Мужчына пакуль знаходзіцца пад падпіскай аб нявыездзе. Яго кампутар, як сродак учынення злачынства, канфіскаваны.