У Нямеччыне і Аўстрыі раскрылі сусветную допінгавую сетку

Нямецкія і аўстрыйскія следчыя правялі аперацыю Aderlass.

У выніку аперацыі Aderlass (“Кровапусканне") нямецкія і аўстрыйскія следчыя раскрылі сусветную допінгавую сетку. Генеральны пракурор Мюнхена Кай Грэбер (Kai Gräber) абвясціў у сераду, 20 сакавіка, што пасля допыту галоўнага падазраванага, лекара з Эрфурта Марка С., у следчых органаў з'явіліся звесткі ў дачыненні да 21 спартоўца з 8 еўрапейскіх краін, якія прадстаўляюць 5 тыпаў спорту. Аднак поўны маштаб парушэнняў пакуль цяжка ўявіць, паведамляе dw.com.

Грэбер заявіў пра "трохзначны лік выпадкаў забору крыві", якія праводзіліся з 2011 года да лютага 2019 года ва ўсім свеце. Грэбер паведаміў аб "каласальнай" доваднай базе, а таксама што галоўны падазраваны Марк С. зрабіў "аб'ёмныя" заявы.

Тры з пяці тыпаў спорту - гэта бегавыя лыжы, веласпорт і трыятлон. Два іншыя зімовыя тыпы спорту Грэбер не захацеў назваць у інтарэсах следства. Пракурор таксама паведаміў, што два чалавекі з "эрфуртскай сеткі" лёталі на зімовую Алімпіяду 2018 гадоў у Пхёнчхане, каб забяспечыць там спартоўцаў іх узбагачанай крывёю. Грэбер не захацеў адказваць на пытанне, ці ёсць сярод падазраваных нямецкія атлеты.

Уключаючы аўстрыйскага лыжніка Ёханэса Дзюра, падчас аперацыі Aderlass былі затрыманыя 9 спартоўцаў, у тым ліку з Эстоніі і Казахстана. Кай Грэбер не выключыў, што ў выніку расследавання будзе выяўлена больш допінг-выпадкаў, чым у рамках "Аперацыі Пуэрта", калі пад падазрэннем гішпанскіх следчых апынуліся дзясяткі спартоўцаў.

Са звестак пракурора Грэбера, атлеты плацілі доктару Марку С. за яго паслугі ад 4 000 да 12 000 еўраў за спартыўны сезон, сумарна да 100 тысяч еўраў штогод. Падазраванаму за кожны выпадак пагражае ад 1 да 10 гадоў турмы. Вядучы пракурор Ханс Карнпробст (Hans Kornprobst) паведаміў, што ў следчых цяпер няма дастатковых довадаў, што спартыўныя федэрацыі "сістэматычна падтрымлівалі ўжыванне допінгу".